[๙๘] อถ โข อปรา เทวตา ภควโต สนฺติเก อิมํ อุทานํ อุทาเนสิ สาธุ โข มาริส ทานํ อปฺปกสฺมึปิ สาหุ ทานํ สทฺธายปิ สาหุ ทานํ อปิจ ธมฺมลทฺธสฺสปิ สาหุ ทานํ โย ธมฺมลทฺธสฺส ททาติ ทานํ อุฏฺฐานวิริยาธิคตสฺส ชนฺตุ อติกฺกมฺม [๑]- เวตรณึ ยมสฺส ทิพฺพานิ ฐานานิ อุเปติ มจฺโจติ ฯ

[๙๙] อถ โข อปรา เทวตา ภควโต สนฺติเก อิมํ อุทานํ อุทาเนสิ สาธุ โข มาริส ทานํ อปฺปกสฺมึปิ สาหุ ทานํ สทฺธายปิ สาหุ ทานํ ธมฺมลทฺธสฺสปิ สาหุ ทานํ อปิจ วิเจยฺยทานํปิ สาธุ วิเจยฺยทานํ สุคตปฺปสตฺถํ เย ทกฺขิเณยฺยา อิธ ชีวโลเก เอเตสุ ทินฺนานิ มหปฺผลานิ วีชานิ วุตฺตานิ ยถา สุเขตฺเตติ ฯ

[๑๐๐] อถ โข อปรา เทวตา ภควโต สนฺติเก อิมํ อุทานํ อุทาเนสิ สาธุ โข มาริส ทานํ อปฺปกสฺมึปิ สาหุ ทานํ สทฺธายปิ สาหุ ทานํ ธมฺมลทฺธสฺสปิ สาหุ ทานํ วิเจยฺยทานํปิ สาธุ อปิจ ปาเณสุปิ สาธุ สํยโม โย ปาณภูตานิ ๑ อเหฐยํ จรํ ปรูปวาทา น กโรติ ปาปํ ภีรุํ ปสํสนฺติ น หิ ตตฺถ สูรํ ภยา หิ สนฺโต น กโรนฺติ ปาปนฺติ ฯ อถ โข อปรา เทวตา ภควนฺตํ เอตทโวจ กสฺส นุ โข ภควา สุภาสิตนฺติ ฯ

[๑๐๑] สพฺพาสํ โว สุภาสิตํ ปริยาเยน อปิจ มมาปิ ๒ สุณาถ สทฺธาหิ ๓ ทานํ พหุธา ปสตฺถํ ทานา จ ๔ โข ธมฺมปทํว เสยฺโย ปุพฺเพว หิ ปุพฺพตเรว สนฺโต นิพฺพานเมวชฺฌคมม สปญฺญาติ ฯ จตุตฺถํ นสนฺติสุตฺตํ