[416] Evamme sutaṃ ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhe paṭhamābhisambuddho . Atha kho bhagavato rahogatassa paṭisallīnassa evaṃ cetaso parivitakko udapādi mutto vatamhi tāya dukkarakārikāya sādhu mutto vatamhi tāya anatthasañhitāya dukkarakārikāya sādhu vatamhi satto bodhisamajjhagūti .

[417] Atha kho māro pāpimā bhagavato cetasā ceto parivitakkamaññāya yena bhagavā tenupasaṅkami upasaṅkamitvā bhagavantaṃ gāthāya ajjhabhāsi tapokammā apakkamma yena sujjhanti māṇavā asuddho maññasi suddho suddhimaggaṃ aparaddhoti.

[418] Atha kho bhagavā māro ayaṃ pāpimā iti viditvā māraṃ pāpimantaṃ gāthāhi ajjhabhāsi Anatthasañhitaṃ ñatvā yaṅkiñci aparaṃ tapaṃ sabbaṃ natthāvahaṃ hoti piyārittaṃva dhammani sīlaṃ samādhiṃ paññañca maggaṃ bodhāya bhāvayaṃ pattosmi paramaṃ suddhiṃ nihato tvamasi antakāti. Atha kho māro pāpimā jānāti maṃ bhagavā jānāti maṃ sugatoti dukkhī dummano tatthevantaradhāyīti.