[425] Evamme sutaṃ ekaṃ samayaṃ bhagavā bārāṇasiyaṃ viharati isipatane migadāye . tatra kho bhagavā bhikkhū āmantesi bhikkhavoti. Bhadanteti te bhikkhū bhagavato paccassosuṃ . bhagavā etadavoca mayhaṃ kho bhikkhave yonisomanasikārā yonisosammappadhānā anuttarā vimutti anuppattā anuttarā vimutti sacchikatā tumhepi bhikkhave yonisomanasikārā yonisosammappadhānā anuttaraṃ vimuttiṃ anupāpuṇātha anuttaraṃ vimuttiṃ sacchikarothāti.

[426] Atha kho māro pāpimā yena bhagavā tenupasaṅkami upasaṅkamitvā bhagavantaṃ gāthāya ajjhabhāsi bandhosi mārapāsena ye dibbā ye ca mānusā mārabandhanabandhosi na me samaṇa mokkhasīti.

[427] Muttāhaṃ mārapāsena ye dibbā ye ca mānusā mārabandhanamuttomhi nihato tvamasi antakāti. Atha kho māro pāpimā .pe. Tatthevantaradhāyīti.