[461] Sāvatthiyaṃ ārāme ... tena kho pana samayena bhagavā pañcannaṃ upādānakkhandhānaṃ upādāya bhikkhū dhammiyā kathāya sandasseti samādapeti samuttejeti sampahaṃseti . te ca bhikkhū aṭṭhikatvā manasikatvā sabbacetaso samannāharitvā ohitasotā dhammaṃ suṇanti . atha kho mārassa pāpimato etadahosi ayaṃ kho samaṇo gotamo pañcannaṃ upādānakkhandhānaṃ upādāya bhikkhū dhammiyā kathāya sandasseti samādapeti samuttejeti sampahaṃseti te ca bhikkhū aṭṭhikatvā manasikatvā sabbacetaso samannāharitvā ohitasotā dhammaṃ suṇanti yannūnāhaṃ yena samaṇo gotamo tenupasaṅkameyyaṃ vicakkhukammāyāti . tena kho pana samayena sambahulā pattā ajjhokāse nikkhittā honti.

[462] Atha kho māro pāpimā balibaddavaṇṇaṃ abhinimminitvā yena te pattā tenupasaṅkami . atha kho aññataro bhikkhu aññataraṃ bhikkhuṃ etadavoca bhikkhu bhikkhu eso balibaddo patte bhindeyyāti . Evaṃ vutte bhagavā taṃ bhikkhuṃ etadavoca neso bhikkhu balibaddo māro eso pāpimā tumhākaṃ vicakkhukammāya āgatoti.

[463] Atha kho bhagavā māro ayaṃ pāpimā iti viditvā māraṃ pāpimantaṃ gāthāya ajjhabhāsi rūpaṃ vedayitaṃ saññaṃ viññāṇaṃ yañca saṅkhataṃ nesohamasmi netaṃ me evaṃ tattha virajjati evaṃ virattaṃ khemattaṃ sabbasaññojanātitaṃ anvesaṃ sabbaṭhānesu mārasenāpi nājjhagāti. Atha kho māro pāpimā .pe. Tatthevantaradhāyīti.