[531] Sāvatthīnidānaṃ . atha kho vijayā bhikkhunī pubbaṇhasamayaṃ nivāsetvā .pe. Aññatarasmiṃ rukkhamūle divāvihāraṃ nisīdi.

[532] Atha kho māro pāpimā vijayāya bhikkhuniyā bhayaṃ .pe. Samādhimhā cāvetukāmo yena vijayā bhikkhunī tenupasaṅkami upasaṅkamitvā vijayaṃ bhikkhuniṃ gāthāya ajjhabhāsi Daharā tvaṃ rūpavatī ahañca daharo susu pañcaṅgikena turiyena ehayyebhiramāmhaseti.

[533] Atha kho vijayāya bhikkhuniyā etadahosi ko nu kho ayaṃ manusso vā amanusso vā gāthaṃ bhāsatīti . atha kho vijayāya bhikkhuniyā etadahosi māro kho ayaṃ pāpimā .pe. gāthaṃ bhāsatīti . atha kho vijayā bhikkhunī māro ayaṃ pāpimā iti viditvā māraṃ pāpimantaṃ gāthāhi ajjhabhāsi rūpā saddā gandhā rasā phoṭṭhabbā ca manoramā niyyātayāmi tuyheva māra na hi tena atthikā iminā pūtikāyena bhindanena pabhaṅgunā aṭṭiyāmi harāyāmi kāmataṇhā samūhatā ye ca rūpūpagā sattā ye ca arūpabhāgino yā ca santā samāpatti sabbattha vihato tamoti. Atha kho māro pāpimā jānāti maṃ vijayā bhikkhunīti dukkhī dummano tatthevantaradhāyīti.