[611] Ekaṃ samayaṃ bhagavā magadhesu viharati andhakavinde. Tena kho pana samayena bhagavā rattandhakāratimisāyaṃ ajjhokāse nisinno hoti . devo ca ekamekaṃ phusāyati . atha kho brahmā sahampati abhikkantāya rattiyā abhikkantavaṇṇo kevalakappaṃ andhakavindaṃ obhāsetvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ aṭṭhāsi.

[612] Ekamantaṃ ṭhito kho brahmā sahampati bhagavato santike imā gāthāyo abhāsi sevetha pantāni sayanāsanāni careyya saññojanavippamokkhā sa ce ratiṃ nādhigaccheyya tattha saṅghe vase rakkhitatto satimā kulā kulaṃ piṇḍikāya caranto Indriyagutto nipako satimā sevetha pantāni sayanāsanāni bhayā pamutto abhaye vimutto yattha bheravā siriṃsapā vijju sañcarati thaneti devo andhakāratimisāya rattiyā nisīdi tattha bhikkhu vigatalomahaṃso idañca jātu me diṭṭhaṃ nayidaṃ itihītihaṃ ekasmiṃ brahmacariyasmiṃ sahassaṃ maccuhāyinaṃ bhīyo pañcasatā sekkhā dasā ca dasadhā dasa sabbe sotaṃ samāpannā atiracchānagāmino athāyaṃ itarā pajā puññabhāgāti me mano saṅkhātuṃ nopi sakkomi musāvādassa ottapanti .