[744] Ekaṃ samayaṃ bhagavā sāvatthiyaṃ viharati pubbārāme migāramātupāsāde mahatā bhikkhusaṅghena saddhiṃ pañcamattehi bhikkhusatehi sabbeheva arahantehi . tena kho pana samayena bhagavā tadahuposathe paṇṇarase pavāraṇāya bhikkhusaṅghaparivuto ajjhokāse nisinno hoti . atha kho bhagavā tuṇhībhūtaṃ bhikkhusaṅghaṃ anuviloketvā bhikkhū āmantesi handadāni bhikkhave pavārayāmi vo na ca me kiñci garahatha kāyikaṃ vā vācasikaṃ vāti.

[745] Evaṃ vutte āyasmā sārīputto uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjalimpaṇāmetvā bhagavantaṃ etadavoca na kho mayaṃ bhante bhagavato kiñci garahāma kāyikaṃ vā vācasikaṃ vā bhagavā hi bhante anuppannassa maggassa uppādetā asañjātassa maggassa sañjanetā anakkhātassa maggassa akkhātā maggaññū maggavidū maggakovido maggānugā ca bhante etarahi sāvakā viharanti pacchā samannāgatā ahañca kho bhante bhagavantaṃ pavāremi na ca me bhagavā kiñci garahati kāyikaṃ vā vācasikaṃ vāti. {745.1} Na khvāhaṃ te sārīputta kiñci garahāmi kāyikaṃ vā vācasikaṃ vā paṇḍito tvaṃ sārīputta mahāpañño tvaṃ Sārīputta puthupañño tvaṃ sārīputta hāsapañño tvaṃ sārīputta javanapañño tvaṃ sārīputta tikkhapañño tvaṃ sārīputta nibbedhikapañño tvaṃ sārīputta seyyathāpi sārīputta rañño cakkavattissa jeṭṭhaputto pitarā pavattitaṃ cakkaṃ sammadeva anupavatteti evameva kho tvaṃ sārīputta mayā anuttaraṃ dhammacakkaṃ pavattitaṃ sammadeva anupavattesīti. {745.2} No ce kira me bhante bhagavā kiñci garahati kāyikaṃ vā vācasikaṃ vā imesaṃ pana bhante bhagavā pañcannaṃ bhikkhusatānaṃ na kiñci garahati kāyikaṃ vā vācasikaṃ vāti . imesaṃpi khvāhaṃ sārīputta pañcannaṃ bhikkhusatānaṃ na kiñci garahāmi kāyikaṃ vā vācasikaṃ vā imesaṃ hi sārīputta pañcannaṃ bhikkhusatānaṃ saṭṭhī bhikkhū tevijjā saṭṭhī bhikkhū chaḷabhiññā saṭṭhī bhikkhū ubhatobhāgavimuttā atha itare paññāvimuttāti. {745.3} Atha kho āyasmā vaṅgīso uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjalimpaṇāmetvā bhagavantaṃ etadavoca paṭibhāti maṃ bhagavā paṭibhāti maṃ sugatāti . paṭibhātu taṃ vaṅgīsāti bhagavā avoca.