[895] Sāvatthīnidānaṃ . bhūtapubbaṃ bhikkhave sambahulā isayo sīlavanto kalyāṇadhammā araññāyatane paṇṇakuṭīsu sammanti . Atha kho bhikkhave sakko ca devānamindo vepacitti ca asurindo yena te isayo sīlavanto kalyāṇadhammā tenupasaṅkamiṃsu.

[896] Atha kho bhikkhave vepacitti asurindo aṭaliyo upāhanā ārohitvā khaggaṃ olaggetvā chattena dhāriyamānena aggadvārena assamaṃ pavisitvā te isayo sīlavante kalyāṇadhamme apabyāmato karitvā atikkami . atha kho bhikkhave sakko devānamindo aṭaliyo upāhanā orohitvā khaggaṃ aññesaṃ datvā chattaṃ apaṇāmetvā dvāreneva assamaṃ pavisitvā te isayo sīlavante kalyāṇadhamme anuvātaṃ pañjaliko namassamāno aṭṭhāsi.

[897] Atha kho bhikkhave te isayo sīlavanto kalyāṇadhammā sakkaṃ devānamindaṃ gāthāya ajjhabhāsiṃsu Gandho isīnaṃ ciradakkhitānaṃ kāyā cuto gacchati mālutena ito paṭikkamma sahassanetta gandho isīnaṃ asuci devarājāti.

[898] Gandho isīnaṃ ciradakkhitānaṃ kāyā cuto gacchati mālutena sucitrapupphaṃ sirasmiṃva mālaṃ gandhaṃ etaṃ paṭikaṅkhāma bhante na hettha devā paṭikkūlasaññinoti.