[899] Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho .pe.

[900] Bhagavā etadavoca bhūtapubbaṃ bhikkhave sambahulā isayo sīlavanto kalyāṇadhammā samuddatīre paṇṇakuṭīsu sammanti . tena kho pana samayena bhikkhave devāsurasaṅgāmo samupabyūḷho ahosi . Atha kho bhikkhave tesaṃ isīnaṃ sīlavantānaṃ kalyāṇadhammānaṃ etadahosi dhammikā kho devā adhammikā asurā siyāpi naṃ asurato bhayaṃ yannūna mayaṃ sambaraṃ asurindaṃ upasaṅkamitvā abhayadakkhiṇaṃ yāceyyāmāti.

[901] Atha kho bhikkhave te isayo sīlavanto kalyāṇadhammā Seyyathāpi nāma balavā puriso sammiñjitaṃ vā bāhaṃ pasāreyya pasāritaṃ vā bāhaṃ sammiñjeyya evameva samuddatīre paṇṇakuṭīsu antarahitā sambarassa asurindassa sammukhe pāturahesuṃ . atha kho bhikkhave te isayo sīlavanto kalyāṇadhammā sambaraṃ asurindaṃ gāthāya ajjhabhāsiṃsu isayo sambaraṃ pattā yācanti abhayadakkhiṇaṃ kāmaṃ karosi te dātuṃ bhayassa abhayassa vāti.

[902] Isīnaṃ abhayaṃ natthi duṭṭhānaṃ sakkasevinaṃ abhayaṃ yācamānānaṃ bhayameva dadāmi voti.