[152] Avihaṃ upapannāse vimuttā satta bhikkhavo rāgadosaparikkhīṇā tiṇṇā loke visattikanti. Ye ca te ataruṃ saṅgaṃ maccudheyyaṃ suduttaraṃ te hitvā mānusaṃ dehaṃ dibbayogaṃ upaccagunti. Upako phalagaṇḍo ca pukkusāti ca te tayo bhaddiyo khaṇḍadevo ca bahudantī ca siṅgiyo te hitvā mānusaṃ dehaṃ dibbayogaṃ upaccagunti.

[153] Kusalī bhāsasī tesaṃ mārapāsappahāyinaṃ kassa te dhammamaññāya acchiduṃ bhavabandhananti.

[154] Na aññatra bhagavatā nāññatra tava sāsanā yassa te dhammamaññāya acchiduṃ bhavabandhanaṃ yattha nāmañca rūpañca asesaṃ uparujjhati taṃ te dhammamidhaññāya acchiduṃ bhavabandhananti.

[155] Gambhīraṃ bhāsasī vācaṃ dubbijānaṃ sudubbudhaṃ Kassa tvaṃ dhammamaññāya vācaṃ bhāsasi īdisanti.