[310] Seyyathāpi nāma saradasamaye viddhe vigatavalāhake deve ādicco nabhaṃ abbhussukkamāno sabbaṃ ākāsagataṃ tamagataṃ abhivihacca bhāsate ca tapate ca virocati ca evamevaṃ susimassa devaputtassa devaputtaparisā āyasmato sārīputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.

[311] Atha kho susimo devaputto āyasmantaṃ sārīputtaṃ ārabbha bhagavato santike imaṃ gāthaṃ abhāsi paṇḍitoti samaññāto sārīputto akodhano appiccho sorato danto satthuvaṇṇabhato isīti.

[312] Atha kho bhagavā āyasmantaṃ sārīputtaṃ ārabbha susimaṃ devaputtaṃ gāthāya ajjhabhāsi paṇḍitoti samaññāto sārīputto akodhano appiccho sorato danto kālaṃ kaṅkhati bhāvito sudantoti.