[352] Tena kho pana samayena raññā pasenadikosalena mahājanakāyo bandhāpito hoti . appekacce rajjūhi appekacce addūhi appekacce saṅkhalikāhi . atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ idha bhante raññā pasenadikosalena mahājanakāyo bandhāpito hoti appekacce rajjūhi appekacce addūhi appekacce saṅkhalikāhīti.

[353] Atha kho bhagavā etamatthaṃ viditvā tāyaṃ velāyaṃ imā gāthāyo abhāsi Na taṃ daḷhaṃ bandhanamāhu dhīrā yadāyasaṃ dārujaṃ pabbajañca sārattarattā maṇikuṇḍalesu puttesu dāresu ca yā apekkhā etaṃ daḷhaṃ bandhanamāhu dhīrā ohārinaṃ sithilaṃ duppamuñcaṃ etampi chetvāna paribbajanti anapekkhino kāmasukhaṃ pahāyāti. Paṭhamo vaggo. Tassuddānaṃ rahado puriso rājā piyaṃ attānarakkhitā appakā atthakaraṇā mallikā yaññabandhananti. ---------------