[357] Acchariyaṃ bhante abbhūtaṃ bhante yāva subhāsitañcidaṃ bhante bhagavatā dujjānaṃ kho etaṃ mahārāja tayā gihinā kāmabhoginā .pe. paññavatā no duppaññenāti ete bhante mama purisā cārā ocarakā janapadaṃ ocaritvā āgacchanti tehi paṭhamaṃ ociṇṇaṃ ahaṃ pacchā ohayissāmi idāni te bhante taṃ rajojallaṃ pavāhetvā sunhātā suvilittā kappitakesamassū odātavatthavasanā pañcahi kāmaguṇehi samappitā samaṅgibhūtā maṃ paricārayantīti.

[358] Atha kho bhagavā etamatthaṃ viditvā tāyaṃ velāyaṃ imā gāthāyo abhāsi na vaṇṇarūpena naro sujāto na vissase ittaradassanena susaññatānañhi viyañjanena asaññatā lokamimaṃ caranti paṭirūpako mattikakuṇḍalo ca lohaddhamāso ca suvaṇṇachanno Caranti loke parivārachannā anto asuddhā bahi sobhamānāti.