[359] Sāvatthiyaṃ viharati ... tena kho pana samayena pañcannaṃ rājūnaṃ pasenadipamukhānaṃ pañcahi kāmaguṇehi samappitānaṃ samaṅgibhūtānaṃ paricārayamānānaṃ ayamantarākathā udapādi kiṃ nu kho kāmānaṃ agganti . tatrekacce evamāhaṃsu rūpā kāmānaṃ agganti . Ekacce evamāhaṃsu saddā kāmānaṃ agganti . ekacce evamāhaṃsu gandhā kāmānaṃ agganti . ekacce evamāhaṃsu rasā kāmānaṃ agganti . ekacce evamāhaṃsu phoṭṭhabbā kāmānaṃ agganti . Yato kho te rājāno nāsakkhiṃsu aññamaññaṃ saññāpetuṃ atha kho rājā pasenadikosalo te rājāno etadavoca āyāma mārisā yena bhagavā tenupasaṅkamissāma upasaṅkamitvā bhagavantaṃ etamatthaṃ paṭipucchissāma yathā no bhagavā byākarissati tathā naṃ dhāreyyāmāti . evaṃ mārisāti kho te rājāno rañño pasenadikosalassa paccassosuṃ.

[360] Atha kho te pañca rājāno pasenadipamukhā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinno kho rājā pasenadikosalo bhagavantaṃ Etadavoca idha bhante amhākaṃ pañcannaṃ rājūnaṃ pañcahi kāmaguṇehi samappitānaṃ samaṅgibhūtānaṃ paricārayamānānaṃ ayamantarākathā udapādi kiṃ nu kho kāmānaṃ agganti ekacce evamāhaṃsu rūpā kāmānaṃ agganti ekacce evamāhaṃsu saddā kāmānaṃ agganti ekacce evamāhaṃsu gandhā kāmānaṃ agganti ekacce evamāhaṃsu rasā kāmānaṃ agganti ekacce evamāhaṃsu phoṭṭhabbā kāmānaṃ agganti kiṃ nu kho bhante kāmānaṃ agganti.

[361] Manāpapariyantaṃ khvāhaṃ mahārāja pañcasu kāmaguṇesu agganti vadāmi ye ca mahārāja rūpā ekaccassa manāpā honti te ca rūpā ekaccassa amanāpā honti yehi ca so rūpehi attamano hoti paripuṇṇasaṅkappo so tehi rūpehi aññaṃ rūpaṃ uttaritaraṃ vā paṇītataraṃ vā na pattheti te tassa rūpā paramā honti te tassa rūpā anuttarā honti . ye ca mahārāja saddā ... ye ca mahārāja gandhā ... Ye ca mahārāja rasā ... ye ca mahārāja phoṭṭhabbā ekaccassa manāpā honti te ca phoṭṭhabbā ekaccassa amanāpā honti yehi ca so phoṭṭhabbehi attamano hoti paripuṇṇasaṅkappo so tehi phoṭṭhabbehi aññaṃ phoṭṭhabbaṃ uttaritaraṃ vā paṇītataraṃ vā na pattheti te tassa phoṭṭhabbā paramā honti te Tassa phoṭṭhabbā anuttarā hontīti.