[390] Atha kho rājā pasenadikosalo divādivassa yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . Ekamantaṃ nisinnaṃ kho rājānaṃ pasenadikosalaṃ bhagavā etadavoca handa kuto nu tvaṃ mahārāja āgacchasi divādivassāti . idha bhante sāvatthiyaṃ seṭṭhī gahapati kālakato tamahaṃ aputtakaṃ sāpateyyaṃ rājantepuraṃ atiharitvā āgacchāmi sataṃ bhante satasahassāni hiraññasseva ko pana vādo rūpiyassa tassa kho pana bhante seṭṭhissa gahapatissa evarūpo bhattabhogo ahosi kaṇājakaṃ bhuñjati bilaṅgadutiyaṃ evarūpo vatthabhogo ahosi sāṇaṃ dhāreti tipakkhavasanaṃ evarūpo yānabhogo ahosi jajjararathakena yāti paṇṇacchattakena dhāriyamānenāti.

[391] Evametaṃ mahārāja evametaṃ mahārāja bhūtapubbaṃ so mahārāja seṭṭhī gahapati tagarasikhiṃ nāma paccekasambuddhaṃ piṇḍapātena paṭipādesi detha samaṇassa piṇḍanti vatvā uṭṭhāyāsanā pakkāmi datvā ca pana pacchā vippaṭisārī ahosi varametaṃ piṇḍapātaṃ dāsā vā kammakarā vā bhuñjeyyunti bhātu ca pana ekaṃ puttakaṃ sāpateyyassa kāraṇā jīvitā voropesi. {391.1} Yaṃ kho so mahārāja seṭṭhī gahapati tagarasikhiṃ paccekasambuddhaṃ piṇḍapātena paṭipādesi tassa kammassa vipākena sattakkhattuṃ sugatiṃ saggaṃ lokaṃ upapajji Tasseva kammassa vipākāvasesena imissāyeva sāvatthiyā sattakkhattuṃ seṭṭhittaṃ kāresi. {391.2} Yaṃ kho so mahārāja seṭṭhī gahapati datvā pacchā vippaṭisārī ahosi varametaṃ piṇḍapātaṃ dāsā vā kammakarā vā bhuñjeyyunti tassa kammassa vipākena nāssuḷārāya bhattabhogāya cittaṃ namati nāssuḷārāya vatthabhogāya cittaṃ namati nāssuḷārāya yānabhogāya cittaṃ namati nāssuḷārānaṃ pañcannaṃ kāmaguṇānaṃ bhogāya cittaṃ namati. {391.3} Yaṃ kho so mahārāja seṭṭhī gahapati bhātu ca pana ekaṃ puttakaṃ sāpateyyassa kāraṇā jīvitā voropesi tassa kammassa vipākena bahūni vassāni bahūni vassasatāni bahūni vassasahassāni bahūni vassasatasahassāni niraye paccittha tasseva vassasatāni bahūni kammassa vipākāvasesena idaṃ sattamaṃ aputtakaṃ sāpateyyaṃ rājakosaṃ pavesenti . tassa kho pana mahārāja seṭṭhissa gahapatissa purāṇañca puññaṃ parikkhīṇaṃ navañca puññaṃ anupacitaṃ . ajja pana mahārāja seṭṭhī gahapati mahāroruve niraye paccatīti . evaṃ bhante seṭṭhī gahapati mahāroruvaṃ nirayaṃ upapannoti . evaṃ mahārāja seṭṭhī gahapati mahāroruvaṃ nirayaṃ upapannoti.