[396] Kathañca mahārāja puggalo joti tamaparāyano hoti . Idha mahārāja ekacco puggalo ucce kule pacchājāto hoti khattiyamahāsālakule vā brāhmaṇamahāsālakule vā gahapatimahāsālakule vā aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe . So ca hoti abhirūpo dassanīyo pāsādiko paramāya vaṇṇapokkharatāya samannāgato lābhī annassa pānassa vatthassa yānassa mālāgandhavilepanassa seyyāvasathapadīpeyyassa . So kāyena duccaritaṃ carati vācāya duccaritaṃ carati manasā duccaritaṃ carati . so kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati. {396.1} Seyyathāpi mahārāja puriso pāsādā vā hatthikkhandhaṃ oroheyya hatthikkhandhā vā assapiṭṭhiṃ oroheyya assapiṭṭhiyā vā pallaṅkaṃ oroheyya pallaṅkā vā paṭhaviṃ oroheyya paṭhaviyā vā andhakāraṃ paviseyya tathūpamāhaṃ mahārāja imaṃ puggalaṃ vadāmi. Evaṃ kho mahārāja puggalo joti tamaparāyano hoti.

[397] Kathañca mahārāja puggalo joti jotiparāyano hoti . Idha mahārāja ekacco puggalo ucce kule pacchājāto hoti khattiyamahāsālakule vā brāhmaṇamahāsālakule vā gahapatimahāsālakule vā aḍḍhe mahaddhane mahābhoge pahūtajātarūparajate pahūtavittūpakaraṇe Pahūtadhanadhaññe . so ca hoti abhirūpo dassanīyo pāsādiko paramāya vaṇṇapokkharatāya samannāgato lābhī annassa pānassa vatthassa yānassa mālāgandhavilepanassa seyyāvasathapadīpeyyassa . so kāyena sucaritaṃ carati vācāya sucaritaṃ carati manasā sucaritaṃ carati. So kāyena sucaritaṃ caritvā vācāya sucaritaṃ caritvā manasā sucaritaṃ caritvā kāyassa bhedā parammaraṇā sugatiṃ saggaṃ lokaṃ upapajjati. {397.1} Seyyathāpi mahārāja puriso pallaṅkā vā pallaṅkaṃ saṅkameyya assapiṭṭhiyā vā assapiṭṭhiṃ saṅkameyya hatthikkhandhā vā hatthikkhandhaṃ saṅkameyya pāsādā vā pāsādaṃ saṅkameyya tathūpamāhaṃ mahārāja imaṃ puggalaṃ vadāmi . evaṃ kho mahārāja puggalo joti jotiparāyano hoti . ime kho mahārāja cattāro puggalā santo saṃvijjamānā lokasminti.