[482] Evamme sutaṃ ekaṃ samayaṃ bhagavā sakkesu viharati silāvatiyaṃ . tena kho pana samayena āyasmā samiddhi bhagavato avidūre appamatto ātāpī pahitatto viharati . atha kho āyasmato samiddhissa rahogatassa paṭisallalīnassa evaṃ cetaso parivitakko udapādi lābhā vata me suladdhaṃ vata me yassa me satthā arahaṃ sammāsambuddho lābhā vata me suladdhaṃ vata me yohaṃ evaṃ svākkhāte dhammavinaye pabbajito lābhā vata me suladdhaṃ vata me yassa me sabrahmacārino sīlavanto kalyāṇadhammāti.

[483] Atha kho māro pāpimā āyasmato samiddhissa cetasā cetoparivitakkamaññāya yenāyasmā samiddhi tenupasaṅkami upasaṅkamitvā āyasmato samiddhissa avidūre mahantaṃ bhayabheravaṃ saddamakāsi apissudaṃ paṭhavī maññe udrīyatīti.

[484] Atha kho āyasmā samiddhi yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ Nisinno kho āyasmā samiddhi bhagavantaṃ etadavoca idhāhaṃ bhante bhagavato avidūre appamatto ātāpī pahitatto viharāmi tassa mayhaṃ bhante rahogatassa paṭisallīnassa evaṃ cetaso parivitakko udapādi lābhā vata me suladdhaṃ vata me yassa me satthā arahaṃ sammāsambuddho lābhā vata me suladdhaṃ vata me yohaṃ evaṃ svākkhāte dhammavinaye pabbajito lābhā vata me suladdhaṃ vata me yassa me sabrahmacārino sīlavanto kalyāṇadhammāti tassa mayhaṃ bhante avidūre mahābhayabheravasaddo ahosi apissudaṃ paṭhavī maññe udrīyatīti.

[485] Nesā samiddhi paṭhavī udrīyati māro eso pāpimā tuyhaṃ vicakkhukammāya āgato gaccha tvaṃ samiddhi tattheva appamatto ātāpī pahitatto viharāhīti . evaṃ bhanteti kho āyasmā samiddhi bhagavato paṭissutvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi.