[505] Atha kho taṇhā ca aratī ca rāgā ca māradhītaro yena māro pāpimā tenupasaṅkamiṃsu upasaṅkamitvā māraṃ pāpimantaṃ Gāthāya ajjhabhāsiṃsu kenāsi dummano tāta purisaṃ kaṃ nu socasi mayaṃ taṃ rāgapāsena araññamiva kuñjaraṃ bandhitvā ānayissāma vasago te bhavissatīti.

[506] Arahaṃ sugato loke na rāgena suvānayo māradheyyaṃ atikkanto tasmā socāmahaṃ bhusanti.

[507] Atha kho taṇhā ca aratī ca rāgā ca māradhītaro yena bhagavā tenupasaṅkamiṃsu upasaṅkamitvā bhagavantaṃ etadavocuṃ pāde te samaṇa paricāremāti . atha kho bhagavā na manasākāsi yathātaṃ anuttare upadhisaṅkhaye vimutto.

[508] Atha kho taṇhā ca aratī ca rāgā ca māradhītaro ekamantaṃ apakkamma evaṃ samacintesuṃ uccāvacā kho purisānaṃ adhippāyā yannūna mayaṃ ekasataekasataṃ kumārīvaṇṇasataṃ abhinimmineyyāmāti . Atha kho taṇhā ca aratī ca rāgā ca māradhītaro ekasataekasataṃ kumārīvaṇṇasataṃ abhinimminitvā yena bhagavā tenupasaṅkamiṃsu upasaṅkamitvā bhagavantaṃ etadavocuṃ pāde te samaṇa paricāremāti . Tampi bhagavā na manasākāsi yathātaṃ anuttare upadhisaṅkhaye vimutto.