[534] Sāvatthīnidānaṃ . atha kho uppalavaṇṇā bhikkhunī pubbaṇhasamayaṃ nivāsetvā .pe. aññatarasmiṃ supupphitasālarukkhamūle aṭṭhāsi.

[535] Atha kho māro pāpimā uppalavaṇṇāya bhikkhuniyā bhayaṃ chambhitattaṃ lomahaṃsaṃ uppādetukāmo samādhimhā cāvetukāmo yena uppalavaṇṇā bhikkhunī tenupasaṅkami upasaṅkamitvā uppalavaṇṇaṃ bhikkhuniṃ gāthāya ajjhabhāsi supupphitaggaṃ upagamma bhikkhuni ekā tuvaṃ tiṭṭhasi sālamūle na catthi te dutiyā vaṇṇadhātu idhāgatā tādisikā bhaveyyuṃ bālena tvaṃ bhāyasi dhuttakānanti.

[536] Atha kho uppalavaṇṇāya bhikkhuniyā etadahosi ko nu khvāyaṃ manusso vā amanusso vā gāthaṃ bhāsatīti . atha kho uppalavaṇṇāya bhikkhuniyā etadahosi māro kho ayaṃ pāpimā mama bhayaṃ .pe. gāthaṃ bhāsatīti . atha kho uppalavaṇṇā bhikkhunī māro ayaṃ pāpimā iti viditvā māraṃ pāpimantaṃ gāthāhi ajjhabhāsi sataṃ sahassānipi dhuttakānaṃ idhāgatā tādisikā bhaveyyuṃ lomaṃ na iñjāmi na santasāmi māra na bhāyāmi tamekikāpi esā antaradhāyāmi kucchiṃ vā pavisāmi te pakhumantarikāyampi tiṭṭhanti maṃ na dakkhasi Cittasmiṃ vasibhūtamhi iddhipādā subhāvitā sabbabandhanamuttomhi na taṃ bhāyāmi āvusoti. Atha kho māro pāpimā jānāti maṃ uppalavaṇṇā bhikkhunīti dukkhī dummano tatthevantaradhāyīti.