[541] Sāvatthīnidānaṃ . atha kho upacālā bhikkhunī pubbaṇhasamayaṃ nivāsetvā .pe. Aññatarasmiṃ rukkhamūle divāvihāraṃ nisīdi.

[542] Atha kho māro pāpimā .pe. upacālaṃ bhikkhuniṃ etadavoca kathannu tvaṃ bhikkhuni uppajjitukāmāti . na khvāhaṃ āvuso katthaci uppajjitukāmāti.

[543] Tāvatiṃsā ca yāmā ca tusitā cāpi devatā nimmānaratino devā ye devā vasavattino tattha cittaṃ paṇidhehi rati paccanubhossasīti.

[544] Tāvatiṃsā ca yāmā ca tusitā cāpi devatā nimmānaratino devā ye devā vasavattino kāmabandhanabandhā te enti māravasaṃ puna sabbova āditto loko sabbo loko padhūpito sabbo pajjalito loko sabbo loko pakampito akampitaṃ acalitaṃ aputhujjanasevitaṃ agati yattha mārassa tattha me nirato manoti. Atha kho māro pāpimā jānāti maṃ upacālā bhikkhunīti dukkhī dummano tatthevantaradhāyīti.