[545] Sāvatthiyaṃ ... atha kho sīsupacālā bhikkhunī pubbaṇhasamayaṃ Nivāsetvā .pe. Aññatarasmiṃ rukkhamūle divāvihāraṃ nisīdi.

[546] Atha kho māro pāpimā yena sīsupacālā bhikkhunī tenupasaṅkami upasaṅkamitvā sīsupacāraṃ bhikkhuniṃ etadavoca kassa nu tvaṃ bhikkhuni pāsaṇḍaṃ rocesīti . na khvāhaṃ āvuso kassaci pāsaṇḍaṃ rocemīti.

[547] Kiṃ nu uddissa muṇḍāsi samaṇī viya dissasi na ca rocesi pāsaṇḍaṃ kimidaṃ carasi momuhāti.

[548] Ito bahiddhā pāsaṇḍā diṭṭhīsu saṃsidanti te na tesaṃ dhammaṃ rocemi na te dhammassa kovidā atthi sakyakule jāto buddho appaṭipuggalo sabbābhibhū māranudo sabbattha maparājito sabbattha mutto assito sabbaṃ passati cakkhumā sabbakammakkhayaṃ patto vimutto upadhisaṅkhaye so mayhaṃ bhagavā satthā tassa rocemi sāsananti. Atha kho māro pāpimā jānāti maṃ sīsupacālā bhikkhunīti dukkhī dummano tatthevantaradhāyīti.