[613] Ekaṃ samayaṃ bhagavā sāvatthiyaṃ viharati .pe. tatra kho bhagavā bhikkhū āmantesi bhikkhavoti . bhadanteti te bhikkhū bhagavato paccassosuṃ.

[614] Bhagavā etadavoca bhūtapubbaṃ bhikkhave rājā ahosi aruṇavā nāma . rañño kho pana bhikkhave aruṇavato aruṇavatī nāma rājadhānī ahosi . aruṇavatiṃ kho pana bhikkhave rājadhāniṃ sikhī Bhagavā arahaṃ sammāsambuddho upanissāya vihāsi . sikhissa kho pana bhikkhave bhagavato arahato sammāsambuddhassa abhibhū sambhavaṃ nāma sāvakayugaṃ ahosi aggayugaṃ bhaddayugaṃ .

[615] Atha kho bhikkhave sikhī bhagavā arahaṃ sammāsambuddho abhibhuṃ bhikkhuṃ āmantesi āyāma brāhmaṇa yena aññataro brahmaloko tenupasaṅkamissāma yāva bhattassa kālo bhavissatīti . Evaṃ bhanteti kho bhikkhave abhibhū bhikkhu sikhissa bhagavato arahato sammāsambuddhassa paccassosi . atha kho bhikkhave sikhī ca bhagavā arahaṃ sammāsambuddho abhibhū ca bhikkhu seyyathāpi nāma balavā puriso sammiñjitaṃ vā bāhaṃ pasāreyya pasāritaṃ vā bāhaṃ sammiñjeyya evameva aruṇavatiyā rājadhāniyā antarahitā tasmiṃ brahmaloke pāturahesuṃ . atha kho bhikkhave sikhī bhagavā arahaṃ sammāsambuddho abhibhuṃ bhikkhuṃ āmantesi paṭibhātu brāhmaṇa brahmuno ca brahmaparisāya ca brahmapārisajjānañca dhammī kathāti . evaṃ bhanteti kho bhikkhave abhibhū bhikkhu sikhissa bhagavato arahato sammāsambuddhassa paṭissutvā brahmānañca brahmaparisañca brahmapārisajje ca dhammiyā kathāya sandassesi samādapesi samuttejesi sampahaṃsesi.

[616] Tatra sudaṃ bhikkhave brahmā ca brahmaparisā ca brahmapārisajjā ca ujjhāyanti khīyanti vipācenti acchariyaṃ vata bho abbhūtaṃ vata bho kathañhi nāma satthari sammukhībhūte sāvako dhammaṃ Desessatīti . atha kho bhikkhave sikhī bhagavā arahaṃ sammāsambuddho abhibhuṃ bhikkhuṃ āmantesi ujjhāyanti kho te brāhmaṇa brahmā ca brahmaparisā ca brahmapārisajjā ca acchariyaṃ vata bho abbhūtaṃ vata bho kathañhi nāma satthari sammukhībhūte sāvako dhammaṃ desessatīti tenahi tvaṃ brāhmaṇa bhiyyoso mattāya brahmānañca brahmaparisañca brahmapārisajje ca saṃvejehīti . evaṃ bhanteti kho bhikkhave abhibhū bhikkhu sikhissa bhagavato arahato sammāsambuddhassa paṭissutvā dissamānenapi kāyena dhammaṃ desesi adissamānenapi kāyena dhammaṃ desesi dissamānenapi heṭṭhimena upaḍḍhakāyena adissamānenapi uparimena upaḍḍhakāyena dhammaṃ desesi dissamānenapi uparimena upaḍḍhakāyena adissamānenapi heṭṭhimena upaḍḍhakāyena dhammaṃ desesi.