[617] Tatra sudaṃ bhikkhave brahmā ca brahmaparisā ca brahmapārisajjā ca acchariyabbhūtacittajātā ahesuṃ acchariyaṃ vata bho abbhūtaṃ vata bho samaṇassa mahiddhikatā mahānubhāvatāti . atha kho bhikkhave abhibhū bhikkhu sikhiṃ bhagavantaṃ arahantaṃ sammāsambuddhaṃ etadavoca abhijānāmi khvāhaṃ bhante bhikkhusaṅghassa majjhe evarūpiṃ vācaṃ bhāsitā pahomi khvāhaṃ āvuso brahmaloke ṭhito sahassīlokadhātuṃ sarena viññāpetunti . etassa brāhmaṇa kālo etassa brāhmaṇa kālo yaṃ tvaṃ brāhmaṇa brahmaloke ṭhito Sahassīlokadhātuṃ sarena viññāpeyyāsīti . evaṃ bhanteti kho bhikkhave abhibhū bhikkhu sikhissa bhagavato arahato sammāsambuddhassa paṭissutvā brahmaloke ṭhito imā gāthāyo abhāsi ārabbhatha nikkamatha yuñjatha buddhasāsane dhunātha maccuno senaṃ naḷāgāraṃva kuñjaro yo imasmiṃ dhammavinaye appamatto vihessati pahāya jātisaṃsāraṃ dukkhassantaṃ karissatīti.

[618] Atha kho bhikkhave sikhī ca bhagavā arahaṃ sammāsambuddho abhibhū ca bhikkhu brahmānañca brahmaparisañca brahmapārisajje ca saṃvejetvā seyyathāpi nāma .pe. tasmiṃ brahmaloke antarahitā aruṇavatiyā rājadhāniyā pāturahesuṃ . atha kho bhikkhave sikhī bhagavā arahaṃ sammāsambuddho bhikkhū āmantesi assuttha no tumhe bhikkhave abhibhussa bhikkhuno brahmaloke ṭhitassa gāthāyo bhāsamānassāti . Assumhā kho mayaṃ bhante abhibhussa bhikkhuno brahmaloke ṭhitassa gāthāyo bhāsamānassāti . yathākathaṃ pana tumhe bhikkhave assuttha abhibhussa bhikkhuno brahmaloke ṭhitassa gāthāyo bhāsamānassāti . evaṃ kho mayaṃ bhante assumhā abhibhussa bhikkhuno brahmaloke ṭhitassa gāthāyo bhāsamānassa ārabbhatha nikkamatha yuñjatha buddhasāsane dhunātha maccuno senaṃ naḷāgāraṃva kuñjaro Yo imasmiṃ dhammavinaye appamatto vihessati pahāya jātisaṃsāraṃ dukkhassantaṃ karissatīti evaṃ kho mayaṃ bhante assumhā abhibhussa bhikkhuno brahmaloke ṭhitassa gāthāyo bhāsamānassāti.