[419] Sāvatthiyaṃ viharati ... Tatra kho bhagavā ... Ye hi keci bhikkhave samaṇā vā brāhmaṇā vā paṭhavīdhātuṃ nappajānanti paṭhavīdhātusamudayaṃ nappajānanti paṭhavīdhātunirodhaṃ nappajānanti paṭhavīdhātunirodhagāminiṃ paṭipadaṃ nappajānanti . āpodhātuṃ nappajānanti .pe. tejodhātuṃ nappajānanti ... vāyodhātuṃ nappajānanti vāyodhātusamudayaṃ nappajānanti vāyodhātunirodhaṃ nappajānanti vāyodhātunirodhagāminiṃ paṭipadaṃ nappajānanti na mete bhikkhave samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā na ca pana te āyasmanto sāmaññatthaṃ vā brāhmaññatthaṃ vā diṭṭheva dhamme sayaṃ abhiññā sacchikatvā upasampajja viharanti.

[420] Ye ca kho keci bhikkhave samaṇā vā brāhmaṇā vā paṭhavīdhātuṃ pajānanti paṭhavīdhātusamudayaṃ pajānanti paṭhavīdhātunirodhaṃ pajānanti paṭhavīdhātunirodhagāminiṃ paṭipadaṃ pajānanti . āpodhātuṃ pajānanti .pe. tejodhātuṃ pajānanti ... vāyodhātuṃ pajānanti vāyodhātusamudayaṃ pajānanti vāyodhātunirodhaṃ pajānanti vāyodhātunirodhagāminiṃ paṭipadaṃ pajānanti te ca khome bhikkhave samaṇā vā brāhmaṇā vā samaṇesu ceva samaṇasammatā brāhmaṇesu ca brāhmaṇasammatā te ca panāyasmanto sāmaññatthañca brāhmaññatthañca diṭṭheva dhamme sayaṃ abhiññā sacchikatvā upasampajja viharantīti. Dasamaṃ. Catutthavaggo catuttho. Catutthassa vaggassa uddānaṃ catasso pubbe acari no cedaṃ dukkhena ca abhinandanañca uppādaṃ tayo samaṇabrāhmaṇāti. Dhātusaṃyuttaṃ dutiyaṃ samattaṃ. --------