[531] Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . atha kho āyasmā mahākassapo yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . Ekamantaṃ nisinno kho āyasmā mahākassapo bhagavantaṃ etadavoca ko nu kho bhante hetu ko paccayo yena pubbe appatarāni ceva sikkhāpadāni ahesuṃ bahutarā ca bhikkhū aññāya saṇṭhahiṃsu ko pana bhante hetu ko paccayo yenetarahi bahutarāni ceva sikkhāpadāni appatarā ca bhikkhū aññāya saṇṭhahantīti.

[532] Evañhetaṃ kassapa hoti sattesu hāyamānesu saddhamme antaradhāyamāne bahutarāni ceva sikkhāpadāni honti appatarā ca bhikkhū aññāya saṇṭhahanti na tāva kassapa saddhammassa antaradhānaṃ hoti yāva na saddhammapaṭirūpakaṃ loke uppajjati yato ca kho kassapa saddhammapaṭirūpakaṃ loke uppajjati atha saddhammassa antaradhānaṃ hoti . seyyathāpi kassapa na tāva jātarūpassa Antaradhānaṃ hoti yāva na jātarūpapaṭirūpakaṃ loke uppajjati yato ca kho kassapa jātarūpapaṭirūpakaṃ loke uppajjati atha jātarūpassa antaradhānaṃ hoti . evameva kho kassapa na tāva saddhammassa antaradhānaṃ hoti yāva na saddhammapaṭirūpakaṃ loke uppajjati yato ca kho kassapa saddhammapaṭirūpakaṃ loke uppajjati atha saddhammassa antaradhānaṃ hoti.

[533] Na kho kassapa paṭhavīdhātu saddhammaṃ antaradhāpeti na āpodhātu saddhammaṃ antaradhāpeti na tejodhātu saddhammaṃ antaradhāpeti na vāyodhātu saddhammaṃ antaradhāpeti atha kho idheva te uppajjanti moghapurisā ye imaṃ saddhammaṃ antaradhāpenti seyyathāpi kassapa nāvā ādikeneva opilāvati . na kho kassapa evaṃ saddhammassa antaradhānaṃ hoti.

[534] Pañca khome kassapa okkamaniyā dhammā saddhammassa sammosāya antaradhānāya saṃvattanti . katame pañca . idha kassapa bhikkhū bhikkhuniyo upāsakā upāsikāyo satthari agāravā viharanti appatissā dhamme agāravā viharanti appatissā saṅghe agāravā viharanti appatissā sikkhāya agāravā viharanti appatissā samādhismiṃ agāravā viharanti appatissā . ime kho kassapa pañca okkamaniyā dhammā saddhammassa sammosāya antaradhānāya saṃvattanti.