[680] Sāvatthiyaṃ viharati ... tena kho pana samayena aññataro bhikkhu ativelaṃ kulesu cārittaṃ āpajjati . tamenaṃ bhikkhū evamāhaṃsu mā āyasmā ativelaṃ kulesu cārittaṃ āpajjīti . so bhikkhūhi vuccamāno na ramati . atha kho sambahulā bhikkhū yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ idha bhante aññataro bhikkhu ativelaṃ kulesu cārittaṃ āpajjati tamenaṃ bhikkhū evamāhaṃsu mā āyasmā ativelaṃ kulesu cārittaṃ āpajjīti so [1]- bhikkhūhi vuccamāno na ramatīti.

[681] Bhūtapubbaṃ bhikkhave viḷāro sandhisamalasaṅkatire ṭhito ahosi mudumūsiṃ āgamayamāno yatthāyaṃ mudumūsi gocarāya pakkamissati tattheva naṃ gahetvā khādissāmīti . atha kho [3]- bhikkhave mudumūsi gocarāya pakkāmi . tamenaṃ viḷāro gahetvā sahasā maṃsaṃ khāditvā ajjhohari . tassa sā mudumūsi antampi khādi antaguṇampi khādi . so tatonidānaṃ maraṇampi nigacchati maraṇamattampi dukkhaṃ.

[682] Evameva kho bhikkhave idhekacco bhikkhu pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pavisati arakkhiteneva kāyena arakkhitāya vācāya arakkhitena cittena Anupaṭṭhitāya satiyā asaṃvutehi indriyehi tattha passati mātugāmaṃ dunnivatthaṃ vā duppārutaṃ vā tassa mātugāmaṃ disvāna dunnivatthaṃ vā duppārutaṃ vā rāgo cittaṃ anuddhaṃseti so rāgānuddhaṃsena cittena maraṇaṃ vā nigacchati maraṇamattaṃ vā dukkhaṃ . maraṇaṃ so taṃ bhikkhave ariyassa vinaye yo sikkhaṃ paccakkhāya hīnāyāvattati. Maraṇamattaññeva bhikkhave dukkhaṃ yadidaṃ aññataraṃ saṅkiliṭṭhaṃ āpattiṃ āpajjati yathārūpāya āpattiyā vuṭṭhānaṃ paññāyati . Tasmātiha bhikkhave evaṃ sikkhitabbaṃ rakkhitena kāyena rakkhitāya vācāya rakkhitena cittena upaṭṭhitāya satiyā saṃvutehi indriyehi gāmaṃ vā nigamaṃ vā piṇḍāya pavisissāmāti evañhi vo bhikkhave sikkhitabbanti. Dasamaṃ.