[309] Sāvatthiyaṃ viharati ... tatra kho bhagavā ... Jarāmaraṇaṃ bhikkhave ajānatā apassatā yathābhūtaṃ jarāmaraṇe yathābhūtaṃ ñāṇāya satthā pariyesitabbo jarāmaraṇasamudayaṃ ajānatā apassatā yathābhūtaṃ jarāmaraṇasamudaye yathābhūtaṃ ñāṇāya satthā pariyesitabbo jarāmaraṇanirodhaṃ ajānatā apassatā yathābhūtaṃ jarāmaraṇanirodhe yathābhūtaṃ ñāṇāya satthā pariyesitabbo jarāmaraṇanirodhāminiṃ paṭipadaṃ ajānatā apassatā yathābhūtaṃ jarāmaraṇanirodhagāminiyā paṭipadāya yathābhūtaṃ ñāṇāya satthā pariyesitabboti. [sabbesaṃ evaṃ peyyālo] [1]- jātiṃ bhikkhave ajānatā apassatā yathābhūtaṃ ... bhavaṃ bhikkhave ajānatā apassatā yathābhūtaṃ ... upādānaṃ bhikkhave ajānatā apassatā yathābhūtaṃ ... taṇhaṃ bhikkhave ajānatā apassatā yathābhūtaṃ ... Vedanaṃ bhikkhave ajānatā apassatā yathābhūtaṃ ... phassaṃ bhikkhave ajānatā apassatā yathābhūtaṃ ... Saḷāyatanaṃ bhikkhave ajānatā apassatā yathābhūtaṃ ... Nāmarūpaṃ bhikkhave ajānatā apassatā yathābhūtaṃ ... viññāṇaṃ bhikkhave ajānatā apassatā yathābhūtaṃ ... saṅkhāre bhikkhave ajānatā apassatā yathābhūtaṃ saṅkhāresu yathābhūtaṃ ñāṇāya satthā pariyesitabbo saṅkhārasamudayaṃ ajānatā apassatā yathābhūtaṃ saṅkhārasamudaye yathābhūtaṃ ñāṇāya satthā pariyesitabbo saṅkhāranirodhaṃ ajānatā apassatā Yathābhūtaṃ saṅkhāranirodhe yathābhūtaṃ ñāṇāya satthā pariyesitabbo saṅkhāranirodhagāminiṃ paṭipadaṃ ajānatā apassatā yathābhūtaṃ saṅkhāranirodhagāminiyā paṭipadāya yathābhūtaṃ ñāṇāya satthā pariyesitabboti. [sabbesaṃ catusaccikaṃ kātabbaṃ suttanto eko 1-].

[310] Jarāmaraṇaṃ bhikkhave ajānatā apassatā yathābhūtaṃ jarāmaraṇe yathābhūtaṃ ñāṇāya sikkhā karaṇīyā. [evaṃ peyyālo catusaccikaṃ kātabbaṃ] yogo karaṇīyo ... chando karaṇīyo ... ussoḷhī karaṇīyā ... Appaṭivānī karaṇīyā ... ātappaṃ karaṇīyaṃ ... Viriyaṃ karaṇīyaṃ ... Sātaccaṃ karaṇīyaṃ ... Sati karaṇīyā ... Sampajaññaṃ karaṇīyaṃ ... Appamādo karaṇīyoti. Antarapeyyālo navamo. Tassa uddānaṃ satthā sikkhā ca yogo ca chando ussoḷhi pañcamī appaṭivāniyātappaṃ viriyaṃ sātacca vuccati sati ca sampajaññañca appamādena dvādasāti. Suttantā antarapeyyālā niṭṭhitā. Pare te dvādasa honti suttā dvattiṃsa satāni ca catusaccena te vuttā peyyālā antaramhi yeti. Antarapeyyālesu uddānaṃ samattaṃ. -------------