[331] Sāvatthiyaṃ viharati ... Tatra kho bhagavā ... Seyyathāpi bhikkhave puriso sinerussa pabbatarājassa satta muggamattiyo pāsāṇasakkharā upanikkhipeyya . taṃ kiṃ maññatha bhikkhave katamaṃ nu kho bahutaraṃ yā vā satta muggamattiyo pāsāṇasakkharā upanikkhittā yo vā sineru pabbatarājāti . etadeva bhante bahutaraṃ yadidaṃ sineru pabbatarājā appamattikā satta muggamattiyo pāsāṇasakkharā upanikkhittā neva satimaṃ kalaṃ upenti na sahassimaṃ kalaṃ upenti na satasahassimaṃ kalaṃ upenti sineruṃ pabbatarājānaṃ upanidhāya satta muggamattiyo pāsāṇasakkharā upanikkhittāti.

[332] Evameva kho bhikkhave ariyasāvakassa diṭṭhisampannassa Puggalassa adhigamaṃ upanidhāya aññatitthiyasamaṇabrāhmaṇaparibbājakānaṃ adhigamo neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti . evaṃ mahādhigamo kho bhikkhave diṭṭhisampanno puggalo evaṃ mahābhiññoti. Ekādasamaṃ. Abhisamayavaggo dasamo. Tassa uddānaṃ nakhasikhā pokkharaṇī sambhejjaudakā dve dve paṭhavī dve samuddā tayo ca pabbatūpamāti. Abhisamayasaṃyuttaṃ paṭhamaṃ niṭṭhitaṃ. ----------