[262] Seyyathāpi bhikkhave āpānīyakaṃso vaṇṇasampanno gandhasampanno rasasampanno . so ca kho visena saṃsaṭṭho . atha puriso āgaccheyya ghammābhitatto ghammapareto kilanto tasito pipāsito . tamenaṃ evaṃ vadeyyuṃ ayaṃ te ambho purisa āpānīyakaṃso vaṇṇasampanno gandhasampanno rasasampanno so ca kho visena saṃsaṭṭho sace ākaṅkhasi piva pivato hi kho taṃ chādessati vaṇṇenapi gandhenapi rasenapi pivitvā ca pana tatonidānaṃ maraṇaṃ vā nigacchasi maraṇamattaṃ vā dukkhanti. {262.1} Atha kho bhikkhave tassa purisassa evamassa sakkā kho me ayaṃ surā pipāsitā pānīyena vā vinetuṃ dadhimaṇḍakena vā vinetuṃ maṭṭhaloṇikāya vā vinetuṃ loṇasocirakena vā vinetuṃ na tvevāhantaṃ piveyyaṃ yaṃ mama assa dīgharattaṃ ahitāya dukkhāyāti. So taṃ āpānīyakaṃsaṃ paṭisaṅkhā na piveyya paṭinissajjeyya . so tatonidānaṃ maraṇaṃ vā na nigaccheyya maraṇamattaṃ vā dukkhaṃ . evameva kho bhikkhave ye hi keci atītamaddhānaṃ samaṇā vā brāhmaṇā vā yaṃ loke piyarūpaṃ sātarūpaṃ Taṃ aniccato addakkhuṃ dukkhato addakkhuṃ anattato addakkhuṃ rogato addakkhuṃ bhayato addakkhuṃ te taṇhaṃ pajahiṃsu . ye taṇhaṃ pajahiṃsu te upadhiṃ pajahiṃsu ye upadhiṃ pajahiṃsu te dukkhaṃ pajahiṃsu ye dukkhaṃ pajahiṃsu te parimucciṃsu jātiyā jarāya maraṇena sokehi paridevehi dukkhehi domanassehi upāyāsehi parimucciṃsu dukkhasmāti vadāmi. {262.2} Ye hi keci bhikkhave anāgatamaddhānaṃ .pe. Etarahi samaṇā vā brāhmaṇā vā yaṃ loke piyarūpaṃ sātarūpaṃ taṃ aniccato passanti dukkhato passanti anattato passanti rogato passanti bhayato passanti te taṇhaṃ pajahanti . ye taṇhaṃ pajahanti te upadhiṃ pajahanti ye upadhiṃ pajahanti te dukkhaṃ pajahanti ye dukkhaṃ pajahanti te parimuccanti jātiyā jarāya maraṇena sokehi paridevehi dukkhehi domanassehi upāyāsehi parimuccanti dukkhasmāti vadāmīti. Chaṭṭhaṃ.