[297] Api nu tvaṃ susima evaṃ jānanto evaṃ passanto dibbāya sotadhātuyā visuddhāya atikkantamānusikāya ubho sadde suṇāsi dibbe ca mānuse ca ye dūre santike cāti . No hetaṃ bhante.

[298] Api nu tvaṃ susima evaṃ jānanto evaṃ passanto parasattānaṃ parapuggalānaṃ cetasā ceto paricca jānāsi sarāgaṃ vā cittaṃ sarāgaṃ cittanti pajānāsi .pe. avimuttaṃ vā cittaṃ avimuttaṃ cittanti pajānāsīti. No hetaṃ bhante.

[299] Api nu tvaṃ susima evaṃ jānanto evaṃ passanto anekavihitaṃ pubbenivāsaṃ anussarasi seyyathīdaṃ ekampi jātiṃ .pe. Iti sākāraṃ sauddesaṃ anekavihitaṃ pubbenivāsaṃ anussarasīti . No hetaṃ bhante.

[300] Api nu tvaṃ susima evaṃ jānanto evaṃ passanto dibbena cakkhunā visuddhena atikkantamānusakena satte passasi cavamāne .pe. Yathākammūpage satte pajānāsīti. No hetaṃ bhante.