[365] Ekaṃ samayaṃ bhagavā rājagahe viharati gijjhakūṭe pabbate. Tena kho pana samayena āyasmāpi kho sārīputto sambahulehi bhikkhūhi saddhiṃ bhagavato avidūre caṅkamati āyasmāpi kho mahāmoggallāno sambahulehi bhikkhūhi saddhiṃ bhagavato avidūre caṅkamati āyasmāpi kho mahākassapo sambahulehi bhikkhūhi saddhiṃ bhagavato avidūre caṅkamati āyasmāpi kho anuruddho sambahulehi bhikkhūhi saddhiṃ bhagavato avidūre caṅkamati āyasmāpi kho puṇṇo mantānīputto sambahulehi bhikkhūhi saddhiṃ bhagavato avidūre caṅkamati āyasmāpi kho upāli sambahulehi bhikkhūhi saddhiṃ bhagavato avidūre caṅkamati āyasmāpi kho ānando sambahulehi bhikkhūhi saddhiṃ bhagavato avidūre caṅkamati devadattopi kho sambahulehi bhikkhūhi saddhiṃ bhagavato avidūre caṅkamati.

[366] Atha kho bhagavā bhikkhū āmantesi passatha no tumhe bhikkhave sārīputtaṃ sambahulehi bhikkhūhi saddhiṃ caṅkamantanti . Evaṃ bhante . sabbe kho ete bhikkhave bhikkhū mahāpaññā Passatha no tumhe bhikkhave mahāmoggallānaṃ sambahulehi bhikkhūhi saddhiṃ caṅkamantanti . evaṃ bhante . sabbe kho ete bhikkhave bhikkhū mahiddhikā passatha no tumhe bhikkhave mahākassapaṃ sambahulehi bhikkhūhi saddhiṃ caṅkamantanti . evaṃ bhante . sabbe kho ete bhikkhave bhikkhū dhutavādā passatha no tumhe bhikkhave anuruddhaṃ sambahulehi bhikkhūhi saddhiṃ caṅkamantanti . evaṃ bhante . sabbe kho ete bhikkhave bhikkhū dibbacakkhukā passatha no tumhe bhikkhave puṇṇaṃ mantānīputtaṃ sambahulehi bhikkhūhi saddhiṃ caṅkamantanti . evaṃ bhante . sabbe kho ete bhikkhave bhikkhū dhammakathikā passatha no tumhe bhikkhave upāliṃ sambahulehi bhikkhūhi saddhiṃ caṅkamantanti . Evaṃ bhante . sabbe kho ete bhikkhave bhikkhū vinayadharā passatha no tumhe bhikkhave ānandaṃ sambahulehi bhikkhūhi saddhiṃ caṅkamantanti . Evaṃ bhante . sabbe kho ete bhikkhave bhikkhū bahussutā passatha no tumhe bhikkhave devadattaṃ sambahulehi bhikkhūhi saddhiṃ caṅkamantanti. Evaṃ bhante. Sabbe kho ete bhikkhave bhikkhū pāpicchā.