[404] Pubbeva me bhikkhave sambodhā anabhisambuddhassa bodhisattasseva sato etadahosi ko nu kho paṭhavīdhātuyā assādo ko ādīnavo kiṃ nissaraṇaṃ ko āpodhātuyā assādo ko ādīnavo kiṃ nissaraṇaṃ ko tejodhātuyā assādo ko ādīnavo kiṃ nissaraṇaṃ ko vāyodhātuyā assādo ko ādīnavo kiṃ nissaraṇanti . tassa mayhaṃ bhikkhave etadahosi yaṃ kho paṭhavīdhātuṃ paṭicca uppajjati sukhaṃ somanassaṃ ayaṃ paṭhavīdhātuyā assādo yaṃ paṭhavīdhātu aniccā dukkhā vipariṇāmadhammā ayaṃ paṭhavīdhātuyā ādīnavo yo paṭhavīdhātuyā chandarāgavinayo chandarāgappahānaṃ idaṃ paṭhavīdhātuyā nissaraṇaṃ . yaṃ āpodhātuṃ paṭicca ... Yaṃ tejodhātuṃ paṭicca ... yaṃ vāyodhātuṃ paṭicca uppajjati sukhaṃ somanassaṃ ayaṃ vāyodhātuyā assādo yaṃ vāyodhātu aniccā dukkhā vipariṇāmadhammā ayaṃ vāyodhātuyā ādīnavo yo vāyodhātuyā chandarāgavinayo chandarāgappahānaṃ idaṃ vāyodhātuyā nissaraṇaṃ .

[405] Yāvakīvañcāhaṃ bhikkhave imāsaṃ catunnaṃ dhātūnaṃ evaṃ assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññāsiṃ neva tāvāhaṃ bhikkhave sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddho paccaññāsiṃ . yato ca khvāhaṃ bhikkhave imāsaṃ catunnaṃ dhātūnaṃ evaṃ assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññāsiṃ athāhaṃ bhikkhave sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddho paccaññāsiṃ . ñāṇañca pana me dassanaṃ udapādi akuppā me vimutti ayamantimā jāti natthidāni punabbhavoti. Dutiyaṃ.