[425] Sāvatthiyaṃ viharati ... tatra kho bhagavā ... Anamataggoyaṃ bhikkhave saṃsāro .pe. taṃ kiṃ maññatha bhikkhave katamaṃ nu kho bahutaraṃ yaṃ vā vo iminā dīghena addhunā sandhāvataṃ saṃsarataṃ amanāpasampayogā manāpavippayogā kandantānaṃ rodantānaṃ assu pasandaṃ paggharitaṃ yaṃ vā catūsu mahāsamuddesu udakanti . Yathā kho mayaṃ bhante bhagavatā dhammaṃ desitaṃ ājānāma etadeva bhante bahutaraṃ yaṃ no iminā dīghena addhunā sandhāvataṃ saṃsarataṃ amanāpasampayogā manāpavippayogā kandantānaṃ rodantānaṃ assu pasandaṃ paggharitaṃ na tveva catūsu mahāsamuddesu udakanti.

[426] Sādhu sādhu bhikkhave sādhu kho me tumhe bhikkhave evaṃ dhammaṃ desitaṃ ājānātha etadeva bhikkhave bahutaraṃ yaṃ vo iminā dīghena addhunā sandhāvataṃ saṃsarataṃ amanāpasampayogā manāpavippayogā kandantānaṃ rodantānaṃ assu pasandaṃ paggharitaṃ na tveva catūsu mahāsamuddesu udakaṃ . dīgharattaṃ vo bhikkhave mātumaraṇaṃ paccanubhūtaṃ tesaṃ vo mātumaraṇaṃ paccanubhontānaṃ amanāpasampayogā manāpavippayogā kandantānaṃ rodantānaṃ assu pasandaṃ paggharitaṃ na tveva catūsu mahāsamuddesu udakaṃ . dīgharattaṃ vo bhikkhave pitumaraṇaṃ paccanubhūtaṃ ... bhātumaraṇaṃ paccanubhūtaṃ ... bhaginimaraṇaṃ paccanubhūtaṃ ... Puttamaraṇaṃ paccanubhūtaṃ ... dhītumaraṇaṃ paccanubhūtaṃ ... ñātibyasanaṃ paccanubhūtaṃ ... bhogabyasanaṃ paccanubhūtaṃ ... dīgharattaṃ vo bhikkhave rogabyasanaṃ paccanubhūtaṃ tesaṃ vo rogabyasanaṃ paccanubhontānaṃ amanāpasampayogā manāpavippayogā kandantānaṃ rodantānaṃ assu pasandaṃ paggharitaṃ na tveva catūsu mahāsamuddesu udakaṃ taṃ kissa hetu anamataggoyaṃ bhikkhave saṃsāro .pe. yāvañcidaṃ bhikkhave alameva sabbasaṅkhāresu nibbindituṃ alaṃ virajjituṃ alaṃ vimuccitunti. Tatiyaṃ.