[483] Rājagahe viharati veḷuvane ... atha kho āyasmā mahākassapo yena bhagavā tenusaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinnaṃ kho āyasmantaṃ mahākassapaṃ bhagavā etadavoca ovada kassapa bhikkhū karohi kassapa bhikkhūnaṃ dhammiṃ kathaṃ ahaṃ vā kassapa bhikkhū ovadeyyaṃ tvaṃ vā ahaṃ vā bhikkhūnaṃ dhammiṃ kathaṃ kareyyaṃ tvaṃ vāti.

[484] Dubbacā kho bhante bhagavā etarahi bhikkhū dovacassakaraṇehi karaṇehi dhammehi samannāgatā akkhamā appadakkhiṇaggāhino anusāsaniṃ . idhāhaṃ bhante addasaṃ bhaṇḍañca nāma bhikkhuṃ ānandassa saddhivihāriṃ ābhijjikañca nāma bhikkhuṃ anuruddhassa saddhivihāriṃ aññamaññaṃ sutena accāvadante ehi bhikkhu ko bahutaraṃ bhāsissati ko sundarataraṃ bhāsissati ko cirataraṃ bhāsissatīti.

[485] Atha kho bhagavā aññataraṃ bhikkhuṃ āmantesi ehi tvaṃ bhikkhu mama vacanena bhaṇḍañca bhikkhuṃ ānandassa saddhivihāriṃ ābhijjikañca bhikkhuṃ anuruddhassa saddhivihāriṃ āmantehi satthā āyasmante āmantetīti . evaṃ bhanteti kho so bhikkhu bhagavato paṭissuṇitvā yena te bhikkhū tenupasaṅkami upasaṅkamitvā te Bhikkhū etadavoca satthā āyasmante āmantetīti . evamāvusoti kho te bhikkhū tassa bhikkhuno paṭissuṇitvā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu.

[486] Ekamantaṃ nisinne kho te bhikkhū bhagavā etadavoca saccaṃ kira tumhe bhikkhave aññamaññaṃ sutena accāvadatha ehi bhikkhu ko bahutaraṃ bhāsissati ko sundarataraṃ bhāsissati ko cirataraṃ bhāsissatīti . evaṃ bhanteti . kinnu me tumhe bhikkhave evaṃ dhammaṃ desitaṃ ājānātha evaṃ tumhe bhikkhave aññamaññaṃ sutena accāvadatha ehi bhikkhu ko bahutaraṃ bhāsissati ko sundarataraṃ bhāsissati ko cirataraṃ bhāsissatīti . no hetaṃ bhante . no ce kira me tumhe bhikkhave evaṃ dhammaṃ desitaṃ ājānātha atha kiñcarahi tumhe moghapurisā kiṃ jānantā kiṃ passantā evaṃ svākkhāte dhammavinaye pabbajitā samānā aññamaññaṃ sutena accāvadatha ehi bhikkhu ko bahutaraṃ bhāsissati ko sundarataraṃ bhāsissati ko cirataraṃ bhāsissatīti.