[487] Atha kho te bhikkhū bhagavato pādesu sirasā nipatitvā bhagavantaṃ etadavocuṃ accayo no bhante accagamā yathābāle yathāmūḷhe yathāakusale ye mayaṃ evaṃ svākkhāte dhammavinaye pabbajitā samānā aññamaññaṃ sutena accāvadimhā ehi bhikkhu ko bahutaraṃ bhāsissati ko sundarataraṃ bhāsissati ko cirataraṃ bhāsissatīti Tesaṃ no bhante bhagavā accayaṃ accayato paṭiggaṇhātu āyatiṃ saṃvarāyāti.

[488] Taggha tumhe bhikkhave accayo accagamā yathābāle yathāmūḷhe yathāakusale ye tumhe evaṃ svākkhāte dhammavinaye pabbajitā samānā aññamaññaṃ sutena accāvadittha ehi bhikkhu ko bahutaraṃ bhāsissati ko sundarataraṃ bhāsissati ko cirataraṃ bhāsissatīti yato ca kho tumhe bhikkhave accayaṃ accayato disvā yathādhammaṃ paṭikarotha taṃ vo mayaṃ accayaṃ paṭiggaṇhāma vuḍḍhi hesā bhikkhave ariyassa vinaye yo accayaṃ accayato disvā yathādhammaṃ paṭikaroti āyatiṃ ca saṃvaraṃ āpajjatīti. Chaṭṭhaṃ.