[512] Evamme sutaṃ ekaṃ samayaṃ āyasmā mahākassapo sāvatthiyaṃ viharati jetavane anāthapiṇḍikassa ārāme . atha kho Āyasmā ānando pubbaṇhasamayaṃ nivāsetvā pattacīvaramādāya yenāyasmā mahākassapo tenupasaṅkami upasaṅkamitvā āyasmantaṃ mahākassapaṃ etadavoca āyāma bhante kassapa yena aññataro bhikkhunūpassayo tenupasaṅkamissāmāti . gaccha tvaṃ āvuso ānanda bahukicco tvaṃ bahukaraṇīyoti . dutiyampi kho āyasmā ānando āyasmantaṃ mahākassapaṃ etadavoca āyāma bhante kassapa yena aññataro bhikkhunūpassayo tenupasaṅkamissāmāti . gaccha tvaṃ āvuso ānanda bahukicco tvaṃ bahukaraṇīyoti . tatiyampi kho āyasmā ānando āyasmantaṃ mahākassapaṃ etadavoca āyāma bhante kassapa yena aññataro bhikkhunūpassayo tenupasaṅkamissāmāti.

[513] Atha kho āyasmā mahākassapo pubbaṇhasamayaṃ nivāsetvā pattacīvaramādāya āyasmatā ānandena pacchāsamaṇena yena aññataro bhikkhunūpassayo tenupasaṅkami upasaṅkamitvā paññatte āsane nisīdi . atha kho sambahulā bhikkhuniyo yenāyasmā mahākassapo tenupasaṅkamiṃsu upasaṅkamitvā āyasmantaṃ mahākassapaṃ abhivādetvā ekamantaṃ nisīdiṃsu . ekamantaṃ nisinnā kho tā bhikkhuniyo āyasmā mahākassapo dhammiyā kathāya sandassesi samādapesi samuttejesi sampahaṃsesi . atha kho āyasmā mahākassapo tā bhikkhuniyo dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi.

[514] Atha kho thullatissā bhikkhunī anattamanā anattamanavācaṃ nicchāresi kiṃ pana ayyo mahākassapo ayyassa ānandassa vedehamunino sammukhā dhammaṃ bhāsitabbaṃ maññati seyyathāpi nāma sūcibāṇijako sukhumasūcikārassa santike sūciṃ vikketabbaṃ maññeyya evameva ayyo mahākassapo ayyassa ānandassa vedehamunino sammukhā dhammaṃ bhāsitabbaṃ maññatīti . assosi kho āyasmā mahākassapo thullatissāya bhikkhuniyā imaṃ vācaṃ bhāsamānāya . Atha kho āyasmā mahākassapo āyasmantaṃ ānandaṃ etadavoca kiṃ nu kho āvuso ānanda ahaṃ sūcibāṇijako tvaṃ sūcikāro udāhu ahaṃ sūcikāro tvaṃ sūcibāṇijakoti . khamatha bhante kassapa bālo mātugāmoti.