[525] So khvāhaṃ āvuso paṭapilotikānaṃ saṅghāṭiṃ bhagavato pādāsiṃ ahaṃ panassa bhagavato sāṇāni paṃsukūlāni nibbasanāni paṭipajjiṃ . yañhi taṃ āvuso sammā vadamāno vadeyya bhagavato putto oraso mukhato jāto dhammajo dhammanimmito dhammadāyādo paṭiggahitāni sāṇāni paṃsukūlāni nibbasanānīti mamaṃ taṃ sammā vadamāno vadeyya bhagavato putto oraso mukhato jāto dhammajo dhammanimmito dhammadāyādo paṭiggahitāni sāṇāni paṃsukūlāni nibbasanānīti.

[526] Ahaṃ kho āvuso yāvadeva ākaṅkhāmi vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi . ahaṃ kho āvuso yāvadeva ākaṅkhāmi .pe. [navannaṃ anupubbavihārasamāpattīnaṃ pañcannañca abhiññānaṃ evaṃ peyyālo].

[527] Ahaṃ kho āvuso āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharāmi . sattaratanaṃ vā so āvuso nāgaṃ aḍḍhaṭṭhamaratanaṃ vā tālapattikāya chādetabbaṃ maññeyya yo maṃ chahi abhiññāhi chādetabbaṃ maññeyyāti . cavittha ca pana thullanandā bhikkhunī brahmacariyamhāti. Ekādasamaṃ.