[553] Sāvatthiyaṃ viharati ... Dāruṇo bhikkhave lābhasakkārasiloko .pe. Adhigamāya.

[554] Passatha no tumhe bhikkhave rattiyā paccūsasamayaṃ jarasigālassa vasamānassāti. Evaṃ bhante. So kho bhikkhave jarasigālo Ukkaṇṇakena nāma rogajātena phuṭṭho neva thalagato ramati na rukkhamūlagato ramati na abbhokāsagato ramati yena yena gacchati yattha yattha tiṭṭhati yattha yattha nisīdati yattha yattha nipajjati tattha tattha anayabyasanaṃ āpajjati . evameva kho bhikkhave idhekacco bhikkhu lābhasakkārasilokena abhibhūto pariyādinnacitto neva suññāgāragato ramati na rukkhamūlagato ramati na abbhokāsagato ramati yena yena gacchati yattha yattha tiṭṭhati yattha yattha nisīdati yattha yattha nipajjati tattha tattha anayabyasanaṃ āpajjati . evaṃ dāruṇo kho bhikkhave lābhasakkārasiloko .pe. Evañhi vo bhikkhave sikkhitabbanti. Aṭṭhamaṃ.