[555] Sāvatthiyaṃ viharati ... Dāruṇo bhikkhave lābhasakkārasiloko .pe. Adhigamāya.

[556] Upari bhikkhave ākāse verambhā nāma vātā vāyanti tattha yo pakkhī gacchati tamenaṃ verambhā vātā khipanti tassa verambhavātukkhittassa aññeneva pādā gacchanti aññena pakkhā gacchanti aññena sīsaṃ gacchati aññena kāyo gacchati . evameva kho bhikkhave idhekacco bhikkhu lābhasakkārasilokena abhibhūto pariyādinnacitto pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṃvutehi indriyehi so Tattha passati mātugāmaṃ dunnivatthaṃ vā duppārutaṃ vā tassa mātugāmaṃ disvāna dunnivatthaṃ vā duppārutaṃ vā rāgo cittaṃ anuddhaṃseti so rāgānuddhaṃsena cittena sikkhaṃ paccakkhāya hīnāyāvattati tassa aññe cīvaraṃ haranti aññe pattaṃ haranti aññe nisīdanaṃ haranti aññe sūcigharaṃ haranti verambhavātukkhittasseva sakuṇassa . evaṃ dāruṇo kho bhikkhave lābhasakkārasiloko .pe. evañhi vo bhikkhave sikkhitabbanti. Navamaṃ.