[557] Sāvatthiyaṃ viharati ... Dāruṇo bhikkhave lābhasakkārasiloko .pe. Adhigamāya.

[558] Idhāhaṃ bhikkhave ekaccaṃ puggalaṃ passāmi sakkārena abhibhūtaṃ pariyādinnacittaṃ kāyassa bhedā parammaraṇā apāyaṃ duggatiṃ vinipātaṃ nirayaṃ upapannaṃ . idha panāhaṃ bhikkhave ekaccaṃ puggalaṃ passāmi asakkārena abhibhūtaṃ pariyādinnacittaṃ kāyassa bhedā parammaraṇā apāyaṃ duggatiṃ vinipātaṃ nirayaṃ upapannaṃ . idha panāhaṃ bhikkhave ekaccaṃ puggalaṃ passāmi sakkārena ca asakkārena ca tadubhayena abhibhūtaṃ pariyādinnacittaṃ kāyassa bhedā parammaraṇā apāyaṃ duggatiṃ vinipātaṃ nirayaṃ upapannaṃ . evaṃ dāruṇo kho bhikkhave lābhasakkārasiloko .pe. Evañhi vo bhikkhave sikkhitabbanti.

[559] Idamavoca bhagavā idaṃ vatvāna sugato athāparaṃ etadavoca satthā Yassa sakkariyamānassa asakkārena cūbhayaṃ samādhi na vikampati appamāṇavihārino taṃ jhāyinaṃ sātatikaṃ sukhumadiṭṭhivipassakaṃ upādānakkhayārāmaṃ āhu sappuriso itīti. Dasamaṃ. Paṭhamavaggo paṭhamo. Tassa uddānaṃ suddhakaṃ baḷisaṃ kummaṃ dīghalomaṃ puneḷakaṃ asani diṭṭhi sigālaṃ verambhena sagayhakanti . -------