[592] Rājagahe viharati veḷuvane kalandakanivāpe . tena kho pana samayena devadattassa ajātasattukumāro pañcahi rathasatehi sāyaṃ pātaṃ upaṭṭhānaṃ gacchati pañca ca thālipākasatāni bhattābhihāro abhihariyati . atha kho sambahulā bhikkhū yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ devadattassa bhante ajātasattukumāro pañcahi rathasatehi sāyaṃ pātaṃ upaṭṭhānaṃ gamissati pañca ca thālipākasatāni bhattābhihāro abhihariyissatīti.

[593] Mā bhikkhave devadattassa lābhasakkārasiloko pihayittha . Yāvakīvañca bhikkhave devadattassa ajātasattukumāro pañcahi rathasatehi sāyaṃ pātaṃ upaṭṭhānaṃ gamissati pañca ca thālipākasatāni bhattābhihāro abhihariyissati . hāniyeva bhikkhave devadattassa pāṭikaṅkhā kusalesu dhammesu no vuḍḍhi.

[594] Seyyathāpi bhikkhave caṇḍassa kukkurassa nāsāya pittaṃ Bhindeyyuṃ evañhi vo bhikkhave kukkuro bhiyyoso mattāya caṇḍataro assa . evameva kho bhikkhave yāvakīvañca devadattassa ajātasattukumāro pañcahi rathasatehi sāyaṃ pātaṃ upaṭṭhānaṃ gamissati pañca ca thālipākasatāni bhattābhihāro abhihariyissati hāniyeva bhikkhave devadattassa pāṭikaṅkhā kusalesu dhammesu no vuḍḍhi. Evaṃ dāruṇo kho bhikkhave lābhasakkārasiloko .pe. Sikkhitabbanti. Chaṭṭhaṃ.