[663] Sāvatthiyaṃ viharati ... atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi taṃ kiṃ maññatha bhikkhave katamaṃ nu kho bahutaraṃ yo cāyaṃ mayā paritto nakhasikhāyaṃ paṃsu āropito yā cāyaṃ mahāpaṭhavīti . etadeva bhante bahutaraṃ yadidaṃ mahāpaṭhavī appamattakoyaṃ bhagavatā paritto nakhasikhāyaṃ paṃsu āropito saṅkhampi na upeti upanidhampi na upeti kalabhāgampi na upeti mahāpaṭhaviṃ upanidhāya bhagavatā paritto nakhasikhāyaṃ paṃsu āropitoti.

[664] Evameva kho bhikkhave appakā te sattā ye manussesu paccājāyanti atha kho eteyeva bahutarā sattā ye aññatra manussehi paccājāyanti . tasmātiha bhikkhave evaṃ Sikkhitabbaṃ appamattā viharissāmāti evañhi vo bhikkhave sikkhitabbanti. Dutiyaṃ.