[71] Rājagahe viharati veḷuvane ... Atha kho āyasmā sārīputto pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi . atha kho āyasmato sārīputtassa etadahosi atippago kho tāva rājagahe piṇḍāya carituṃ yannūnāhaṃ yena aññatitthiyānaṃ paribbājakānaṃ ārāmo tenupasaṅkameyyanti . atha kho āyasmā sārīputto yena aññatitthiyānaṃ paribbājakānaṃ ārāmo tenupasaṅkami Upasaṅkamitvā tehi aññatitthiyehi paribbājakehi saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi.

[72] Ekamantaṃ nisinnaṃ kho āyasmantaṃ sārīputtaṃ te aññatitthiyā paribbājakā etadavocuṃ santāvuso sārīputta eke samaṇabrāhmaṇā kammavādā sayaṃkataṃ dukkhaṃ paññapenti . santi panāvuso sārīputta eke samaṇabrāhmaṇā kammavādā parakataṃ dukkhaṃ paññapenti . santāvuso sārīputta eke samaṇabrāhmaṇā kammavādā sayaṃkatañca parakatañca dukkhaṃ paññapenti . santi panāvuso sārīputta eke samaṇabrāhmaṇā kammavādā asayaṃkāraṃ aparakāraṃ adhicca samuppannaṃ dukkhaṃ paññapenti . idha panāvuso sārīputta samaṇo gotamo kiṃvādī kimakkhāyī kathaṃ byākaramānā ca mayaṃ vuttavādino ceva samaṇassa gotamassa assāma na ca samaṇaṃ gotamaṃ abhūtena abbhācikkheyyāma dhammassa cānudhammaṃ byākareyyāma na ca koci sahadhammiko vādānupāto gārayhaṃ ṭhānaṃ āgaccheyyāti.

[73] Paṭiccasamuppannaṃ kho āvuso dukkhaṃ vuttaṃ bhagavatā kiṃ paṭicca phassaṃ paṭicca iti vadaṃ vuttavādī ceva bhagavato assa na ca bhagavantaṃ abhūtena abbhācikkheyya dhammassa cānudhammaṃ byākareyya na ca koci sahadhammiko vādānupāto gārayhaṃ ṭhānaṃ āgaccheyya. {73.1} Tatrāvuso ye te samaṇabrāhmaṇā kammavādā sayaṃkataṃ dukkhaṃ paññapenti tadapi phassapaccayā . yepi te .pe. yepi te .pe. Yepi te samaṇabrāhmaṇā kammavādā asayaṃkāraṃ aparakāraṃ adhicca samuppannaṃ dukkhaṃ paññapenti tadapi phassapaccayā. {73.2} Tatrāvuso ye te samaṇabrāhmaṇā kammavādā sayaṃkataṃ dukkhaṃ paññapenti te vata aññatra phassā paṭisaṃvedayantīti netaṃ ṭhānaṃ vijjati . yepi te samaṇabrāhmaṇā kammavādā parakataṃ dukkhaṃ paññapenti te vata aññatra phassā paṭisaṃvedayantīti netaṃ ṭhānaṃ vijjati. Yepi te samaṇabrāhmaṇā kammavādā sayaṃkatañca parakatañca dukkhaṃ paññapenti te vata aññatra phassā paṭisaṃvedayantīti netaṃ ṭhānaṃ vijjati . yepi te samaṇabrāhmaṇā kammavādā asayaṃkāraṃ aparakāraṃ adhicca samuppannaṃ dukkhaṃ paññapenti te vata aññatra phassā paṭisaṃvedayantīti netaṃ ṭhānaṃ vijjatīti.