[691] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena āyasmā ca sārīputto āyasmā ca mahāmoggallāno rājagahe viharanti veḷuvane kalandakanivāpe ekavihāre . atha kho āyasmā sārīputto sāyaṇhasamayaṃ paṭisallānā vuṭṭhito yenāyasmā mahāmoggallāno tenupasaṅkami upasaṅkamitvā āyasmatā mahāmoggallānena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi.

[692] Ekamantaṃ nisinno kho āyasmā sārīputto āyasmantaṃ mahāmoggallānaṃ etadavoca vippasannāni kho te āvuso moggallāna indriyāni parisuddho mukhavaṇṇo pariyodāto santena nūnāyasmā mahāmoggallāno ajja vihārena vihāsīti . oḷārikena khvāhaṃ āvuso ajja vihārena vihāsiṃ apica me ahosi dhammī kathāti . Kena saddhiṃ panāyasmato mahāmoggallānassa ahosi dhammī kathāti . Bhagavatā kho me āvuso saddhiṃ ahosi dhammī kathāti . dūre kho āvuso bhagavā etarahi sāvatthiyaṃ viharati jetavane anāthapiṇḍikassa ārāme kinnu kho āyasmā mahāmoggallāno bhagavantaṃ iddhiyā upasaṅkami udāhu bhagavā āyasmantaṃ mahāmoggallānaṃ iddhiyā upasaṅkamīti . na khvāhaṃ āvuso bhagavantaṃ iddhiyā upasaṅkamiṃ napi maṃ bhagavā iddhiyā upasaṅkami apica me yāvatā bhagavā ettāvatā dibbacakkhuṃ visujjhi dibbā ca sotadhātu bhagavatopi yāvatāhaṃ ettāvatā dibbacakkhuṃ visujjhi dibbā ca sotadhātūti . Yathākathaṃ panāyasmato mahāmoggallānassa bhagavatā saddhiṃ ahosi dhammī kathāti.

[693] Idhāhaṃ āvuso bhagavantaṃ etadavocaṃ āraddhaviriyo āraddhaviriyoti bhante vuccati kittāvatā nu kho bhante āraddhaviriyo hotīti . evaṃ vutte maṃ āvuso bhagavāpi etadavoca idha moggallāna bhikkhu āraddhaviriyo viharati kāmaṃ taco ca nahāru ca aṭṭhi ca avasissatu sarīre avasussatu maṃsalohitaṃ yantaṃ purisathāmena purisaviriyena purisaparakkamena pattabbaṃ na taṃ apāpuṇitvā viriyassa saṇṭhānaṃ bhavissatīti evaṃ kho moggallāna āraddhaviriyo hotīti . evaṃ kho me āvuso bhagavatā saddhiṃ ahosi dhammī kathāti.