[212] Sāvatthiyaṃ viharati ... Tatra kho bhagavā ... Saññojaniyesu bhikkhave dhammesu assādānupassino viharato taṇhā pavaḍḍhati taṇhāpaccayā upādānaṃ .pe. evametassa kevalassa dukkhakkhandhassa samudayo hoti.

[213] Seyyathāpi bhikkhave taruṇo rukkho tassa puriso kālena kālaṃ mūlāni palisajjeyya kālena kālaṃ paṃsuṃ dadeyya Kālena kālaṃ udakaṃ dadeyya evañhi so bhikkhave taruṇo rukkho tadāhāro tadupādāno vuḍḍhiṃ virūḷhiṃ vepullaṃ āpajjeyya evameva kho bhikkhave saññojaniyesu dhammesu assādānupassino viharato taṇhā pavaḍḍhati taṇhāpaccayā upādānaṃ .pe. evametassa kevalassa dukkhakkhandhassa samudayo hoti.

[214] Saññojaniyesu bhikkhave dhammesu ādīnavānupassino viharato taṇhā nirujjhati taṇhānirodhā upādānanirodho .pe. Evametassa kevalassa dukkhakkhandhassa nirodho hoti.

[215] Seyyathāpi bhikkhave taruṇo rukkho atha puriso āgaccheyya kuddālapiṭakaṃ ādāya .pe. nadiyā vā sīghasotāya pavāheyya evañhi so bhikkhave taruṇo rukkho ucchinnamūlo assa tālāvatthukato anabhāvaṅgato āyatiṃ anuppādadhammo evameva kho bhikkhave saññojaniyesu dhammesu ādīnavānupassino viharato taṇhā nirujjhati taṇhānirodhā upādānanirodho .pe. Evametassa kevalassa dukkhakkhandhassa nirodho hotīti. Sattamaṃ.