[240] Sāvatthiyaṃ viharati ... tatra kho bhagavā ... Cattārome bhikkhave āhārā bhūtānaṃ vā sattānaṃ ṭhitiyā sambhavesīnaṃ vā Anuggahāya . katame cattāro . kavaḷīkāro āhāro oḷāriko vā sukhumo vā phasso dutiyo manosañcetanā tatiyā viññāṇaṃ catutthaṃ . ime kho bhikkhave cattāro āhārā bhūtānaṃ vā sattānaṃ ṭhitiyā sambhavesīnaṃ vā anuggahāya.

[241] Kathañca bhikkhave kavaḷīkāro āhāro daṭṭhabbo . Seyyathāpi bhikkhave dve jāyapatikā parittaṃ sambalaṃ ādāya kantāramaggaṃ paṭipajjeyyuṃ tesamassa ekaputtako piyo manāpo . Atha kho tesaṃ bhikkhave dvinnaṃ jāyapatikānaṃ kantāragatānaṃ yā parittā sambalamattā sā parikkhayaṃ pariyādānaṃ gaccheyya siyā panesa kantārāvaseso anitthiṇṇo . atha kho tesaṃ bhikkhave dvinnaṃ jāyapatikānaṃ evamassa amhākaṃ kho yā parittā sambalamattā sā parikkhīṇā pariyādinnā atthi cāyaṃ kantārāvaseso anitthiṇṇo yannūna mayaṃ imaṃ ekaputtakaṃ piyaṃ manāpaṃ vadhitvā vallūrañca soṇḍikañca karitvā puttamaṃsāni khādantā eva dvepi taṃ kantārāvasesaṃ nitthareyyāma no ce sabbeva tayo vinassamhāti . Atha kho te bhikkhave dve jāyapatikā etaṃ ekaputtakaṃ piyaṃ manāpaṃ vadhitvā vallūrañca soṇḍikañca karitvā puttamaṃsāni khādantā eva taṃ kantārāvasesaṃ nitthareyyuṃ te puttamaṃsāni ceva khādeyyuṃ ure ca patipiṃseyyuṃ kahaṃ ekaputtaka kahaṃ ekaputtakāti. {241.1} Taṃ kiṃ maññatha bhikkhave api nu te davāya vā āhāraṃ āhareyyuṃ madāya vā Āhāraṃ āhareyyuṃ maṇḍanāya vā āhāraṃ āhareyyuṃ vibhūsanāya vā āhāraṃ āhareyyunti . no hetaṃ bhante . nanu te bhikkhave yāvadeva kantārassa nittharaṇatthāya āhāraṃ āhareyyunti . evaṃ bhante . evameva khvāhaṃ bhikkhave kavaḷīkāro āhāro daṭṭhabboti vadāmi . kavaḷīkāre bhikkhave āhāre pariññāte pañcakāmaguṇiko rāgo pariññāto hoti pañcakāmaguṇike rāge pariññāte natthi taṃ saññojanaṃ yena saññojanena saññutto ariyasāvako puna imaṃ lokaṃ āgaccheyya.