[217] Atha kho āyasmā vakkali acirapakkantassa bhagavato upaṭṭhāke āmantesi etha maṃ āvuso mañcakaṃ āropetvā yena isigilipassaṃ kāḷasilā tenupasaṅkamatha kathaṃ hi nāma mādiso antaraghare kālaṃ kattabbaṃ maññeyyāti . evamāvusoti kho te bhikkhū āyasmato vakkalissa paṭissutvā āyasmantaṃ vakkaliṃ mañcakaṃ āropetvā yena isigilipassaṃ kāḷasilā tenupasaṅkamiṃsu . atha kho bhagavā tañca rattiṃ tañca divasāvasesaṃ gijjhakūṭe pabbate vihāsi . Atha kho dve devatāyo abhikkantāya rattiyā abhikkantavaṇṇā kevalakappaṃ gijjhakūṭaṃ obhāsetvā yena bhagavā tenupasaṅkamiṃsu .pe. Ekamantaṃ aṭṭhaṃsu . ekamantaṃ ṭhitā kho ekā devatā bhagavantaṃ etadavoca vakkali bhante bhikkhu vimokkhāya cetetīti . aparā devatā bhagavantaṃ etadavoca so hi nūna so bhante suvimutto vimuccissatīti . idamavocuṃ tā devatāyo idaṃ vatvā bhagavantaṃ abhivādetvā padakkhiṇaṃ katvā tatthevantaradhāyiṃsu.

[218] Atha kho bhagavā tassā rattiyā accayena bhikkhū āmantesi etha tumhe bhikkhave yena vakkali bhikkhu tenupasaṅkamatha upasaṅkamitvā vakkaliṃ bhikkhuṃ evaṃ vadetha suṇāvuso tvaṃ vakkali bhagavato vacanaṃ dvinnaṃ devatānaṃ imaṃ āvuso rattiṃ dve devatāyo abhikkantāya rattiyā abhikkantavaṇṇā kevalakappaṃ gijjhakūṭaṃ obhāsetvā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ aṭṭhaṃsu ekamantaṃ ṭhitā kho āvuso ekā devatā bhagavantaṃ etadavoca vakkali bhante bhikkhu vimokkhāya cetetīti . aparā devatā bhagavantaṃ etadavoca so hi nūna so bhante suvimutto vimuccissatīti . bhagavā ca taṃ āvuso vakkali evamāha mā bhāyi vakkali mā bhāyi vakkali apāpakante maraṇaṃ bhavissati apāpikā kālakiriyāti . evaṃ bhanteti kho te Bhikkhū bhagavato paṭissutvā yenāyasmā vakkali tenupasaṅkamiṃsu upasaṅkamitvā āyasmantaṃ vakkaliṃ etadavocuṃ suṇāvuso vakkali bhagavato vacanaṃ dvinnañca devatānanti.