[230] Evaṃ vutte therā bhikkhū āyasmantaṃ khemakaṃ etadavocuṃ na kho [1]- mayaṃ āyasmantaṃ khemakaṃ vihesāpekkhā apucchimhā api cāyasmā khemako pahoti tassa bhagavato sāsanaṃ vitthārena ācikkhituṃ desetuṃ paññapetuṃ paṭṭhapetuṃ vivarituṃ vibhajituṃ uttānīkātuṃ yadidaṃ āyasmatā khemakena tassa bhagavato sāsanaṃ vitthārena ācikkhitaṃ desitaṃ paññapitaṃ paṭṭhapitaṃ vivaritaṃ vibhajitaṃ uttānīkatanti. Idamavoca āyasmā khemako . attamanā therā bhikkhū āyasmato khemakassa bhāsitaṃ abhinanduṃ . imasmiñca pana Veyyākaraṇasmiṃ bhaññamāne saṭṭhīmattānaṃ therānaṃ bhikkhūnaṃ anupādāya āsavehi cittāni vimucciṃsu āyasmato ca khemakassāti.