[239] Sāvatthī . tatra kho .pe. nāhaṃ bhikkhave lokena vivadāmi . loko ca kho bhikkhave mayā vivadati . na bhikkhave dhammavādī kenaci lokasmiṃ vivadati . yaṃ bhikkhave natthisammataṃ loke paṇḍitānaṃ ahaṃpi taṃ natthīti vadāmi . yaṃ bhikkhave atthisammataṃ loke paṇḍitānaṃ ahaṃpi taṃ atthīti vadāmi . kiñci bhikkhave natthisammataṃ loke paṇḍitānaṃ yamahaṃ natthīti vadāmi . rūpaṃ bhikkhave niccaṃ dhuvaṃ sassataṃ avipariṇāmadhammaṃ natthisammataṃ loke paṇḍitānaṃ ahaṃpi taṃ natthīti vadāmi . vedanā . saññā . Saṅkhārā. Viññāṇaṃ niccaṃ dhuvaṃ sassataṃ avipariṇāmadhammaṃ natthisammataṃ loke paṇḍitānaṃ ahampi taṃ natthīti vadāmi . idaṃ kho bhikkhave natthisammataṃ loke paṇḍitānaṃ yamahaṃ natthīti vadāmi . kiñca bhikkhave atthisammataṃ loke paṇḍitānaṃ yamahaṃ atthīti vadāmi . rūpaṃ bhikkhave aniccaṃ dukkhaṃ vipariṇāmadhammaṃ atthisammataṃ loke paṇḍitānaṃ ahaṃpi taṃ atthīti vadāmi . vedanā . saññā . saṅkhārā . viññāṇaṃ Aniccaṃ dukkhaṃ vipariṇāmadhammaṃ atthisammataṃ loke paṇḍitānaṃ ahaṃpi taṃ atthīti vadāmi . idaṃ kho bhikkhave atthisammataṃ loke paṇḍitānaṃ yamahaṃ atthīti vadāmi.

[240] Atthi bhikkhave loke lokadhammo taṃ tathāgato abhisambujjhati abhisameti abhisambujjhitvā abhisametvā ācikkhati deseti paññapeti paṭṭhapeti vivarati vibhajati uttānīkaroti . Kiñca bhikkhave loke lokadhammo taṃ tathāgato abhisambujjhati abhisameti abhisambujjhitvā abhisametvā ācikkhati deseti paññapeti paṭṭhapeti vivarati vibhajati uttānīkaroti . Rūpaṃ bhikkhave loke lokadhammo taṃ tathāgato abhisambujjhati .pe. Uttānīkaroti. {240.1} Yo bhikkhave tathāgatena evaṃ ācikkhiyamāne desiyamāne paññapiyamāne paṭṭhapiyamāne vivariyamāne vibhajiyamāne uttānīkariyamāne na jānāti na passati tamahaṃ bhikkhave bālaṃ puthujjanaṃ andhaṃ acakkhukaṃ ajānantaṃ apassantaṃ kinti karomi . Vedanā bhikkhave. Saññā bhikkhave. Saṅkhārā bhikkhave . viññāṇaṃ bhikkhave loke lokadhammo taṃ tathāgato abhisambujjhati abhisameti abhisambujjhitvā abhisametvā ācikkhati deseti paññapeti paṭṭhapeti vivarati vibhajati uttānīkaroti. {240.2} Yo bhikkhave tathāgatena evaṃ ācikkhiyamāne desiyamāne paññapiyamāne paṭṭhapiyamāne vivariyamāne vibhajiyamāne uttānīkariyamāne Na jānāti na passati tamahaṃ bhikkhave bālaṃ puthujjanaṃ andhaṃ acakkhukaṃ ajānantaṃ apassantaṃ kinti karomi.