[242] Ekaṃ samayaṃ bhagavā ayujjhāyaṃ viharati gaṅgāya nadiyā tīre . tatra kho bhagavā bhikkhū āmantesi seyyathāpi bhikkhave ayaṃ gaṅgā nadī mahantaṃ pheṇapiṇḍaṃ āvaheyya tamenaṃ cakkhumā puriso passeyya nijjhāyeyya yoniso upaparikkheyya tassa passato nijjhāyato yoniso upaparikkhato rittakaññeva khāyeyya tucchakaññeva khāyeyya asārakaññeva khāyeyya kiñhi siyā bhikkhave pheṇapiṇḍe sāro . evameva kho bhikkhave yaṅkiñci rūpaṃ atītānāgatapaccuppannaṃ .pe. yaṃ dūre santike vā taṃ bhikkhu passati nijjhāyati yoniso upaparikkhati tassa passato nijjhāyato yoniso upaparikkhato rittakaññeva khāyati tucchakaññeva khāyati asārakaññeva khāyati kiñhi siyā bhikkhave rūpe sāro.

[243] Seyyathāpi bhikkhave saradasamaye thullaphusitake deve vassante udake udakapubbuḷaṃ uppajjati ceva nirujjhati ca tamenaṃ cakkhumā Puriso passeyya nijjhāyeyya yoniso upaparikkheyya tassa passato nijjhāyato yoniso upaparikkhato rittakaññeva khāyeyya tucchakaññeva khāyeyya asārakaññeva khāyeyya kiñhi siyā bhikkhave udakapubbuḷe sāro . evameva kho bhikkhave yā kāci vedanā atītānāgatapaccuppannā .pe. yā dūre santike vā taṃ bhikkhu passati nijjhāyati yoniso upaparikkhati tassa passato nijjhāyato yoniso upaparikkhato rittakaññeva khāyati tucchakaññeva khāyati asārakaññeva khāyati kiñhi siyā bhikkhave vedanāya sāro.

[244] Seyyathāpi bhikkhave gimhānaṃ pacchime māse ṭhite majjhantike kāle marīci phandati tamenaṃ cakkhumā puriso passeyya nijjhāyeyya yoniso upaparikkheyya tassa passato nijjhāyato yoniso upaparikkhato rittakaññeva khāyeyya .pe. kiñhi siyā bhikkhave marīcikāya sāro. Evameva kho bhikkhave yā kāci saññā .pe.